पुणे: बीड येथील राष्ट्रीय पातळीवरील खो-खो खेळाडू तुकाराम करांडे याने पुण्यात गळफास घेऊन आत्महत्या केल्याची धक्कादायक घटना समोर आली आहे. अल्पवयीन मुलीवर अत्याचार केल्याप्रकरणी पॉक्सो कायद्यान्वये गुन्हा दाखल झाल्यानंतर तो फरार झाला होता. अटकेची भीती आणि जामीन मिळण्याबाबत निर्माण झालेल्या तणावातून त्याने हे टोकाचे पाऊल उचलल्याचा प्राथमिक अंदाज व्यक्त केला जात आहे.
तुकाराम करांडे याने राष्ट्रीय खो-खो स्पर्धेत दोन वेळा महाराष्ट्राच्या संघाचे प्रतिनिधित्व केले होते. सुमारे १५ दिवसांपूर्वी बीडमधील बार्शी रोड परिसरात अवैध पिस्तूल बाळगल्याप्रकरणी पोलिसांनी त्याला अटक केली होती. या कारवाईत पोलिसांनी त्याच्याकडून पिस्तूल जप्त केले होते. या प्रकरणात तो जामिनावर बाहेर आला होता.
दरम्यान, बीड तालुक्यातील एका गावातील शाळेत क्रीडा प्रशिक्षण देत असताना तुकारामची एका अल्पवयीन मुलीशी ओळख झाली होती. संबंधित मुलगी शिक्षणासाठी बीड शहरात आल्यानंतर तुकाराम आणि त्याच्या मित्रांनी तिला ब्लॅकमेल करण्यास सुरुवात केल्याचा आरोप आहे. मित्रांच्या मदतीने एका कॅफेमध्ये पिस्तुलाचा धाक दाखवून तिच्यावर अत्याचार केल्याचा गंभीर आरोप संबंधित अल्पवयीन मुलीने केला आहे.
या तक्रारीवरून बीडच्या शिवाजीनगर पोलीस ठाण्यात पॉक्सो कायद्यान्वये गुन्हा दाखल करण्यात आला. गुन्हा दाखल झाल्याचे समजताच तुकाराम करांडे बीडमधून फरार झाला आणि पुण्यात आला होता.
या प्रकरणात तुकाराम आणि त्याच्या सहकाऱ्यांनी न्यायालयात अटकपूर्व जामिनासाठी अर्ज केला होता. या अर्जावर १८ ऑगस्ट रोजी होणारी सुनावणी पुढे ढकलण्यात आली असून, पुढील सुनावणी २१ ऑगस्ट रोजी होणार होती.
दरम्यान, आधीच अवैध पिस्तूल प्रकरणातील गुन्हा आणि त्यानंतर पॉक्सो कायद्यान्वये दाखल झालेला गंभीर गुन्हा यामुळे आपल्याला जामीन मिळणे कठीण असल्याच्या तणावातून तुकारामने आत्महत्या केल्याचा प्राथमिक अंदाज व्यक्त केला जात आहे.
मात्र, आत्महत्येचे नेमके कारण अद्याप अधिकृतपणे स्पष्ट झालेले नाही. पुणे आणि बीड पोलीस या प्रकरणाचा पुढील तपास करत आहेत.
