लोणी काळभोर, ता. 17 : एका खाजगी कोचिंग क्लासला गेलेल्या 14 वर्षीय अल्पवयीन मुलीला अज्ञात इसमाने फुस लावून पळवून नेल्याची घटना कुंजीरवाडी (ता. हवेली) हद्दीत घडली आहे. याप्रकरणी मुलीच्या वडिलांनी लोणी काळभोर पोलीस ठाण्यात अज्ञात इसमाच्या विरोधात फिर्याद दिली आहे. ही घटना मंगळवारी (ता. 14) सकाळी 10 ते साडेअकरा वाजण्याच्या सुमारास घडली.
पोलिसांनी दिलेल्या माहितीनुसार, फिर्यादी यांची मुलगी 14 वर्षे 6 महिन्यांची असून ही कुंजीरवाडी परिसरातील एका बड्या विद्यालयात नववीत शिकते. ती दररोज सकाळी किंवा संध्याकाळी कुंजीरवाडी येथील एका खासगी क्लास जात होती. मंगळवारी शाळेला सुट्टी असल्याने क्लास सकाळी दहा ते साडेअकरा या वेळेत होता. सकाळी 9 वाजून 50 मिनिटांनी मुलीचा भाऊ तिला रिक्षामधून क्लासला सोडण्यासाठी गेला होता.
बहिणीला क्लासच्या बाहेर सोडले आणि क्लास सुटल्यावर तिला घेऊनच घरी जाण्यासाठी तो तिथेच थांबला. सकाळी 11 वाजता क्लास सुटल्यानंतर सर्व मुले बाहेर आली, मात्र त्याची बहिण कुठेच दिसली नाही. भावाने क्लासमध्ये जाऊन शिक्षकांकडे चौकशी केली असता, त्याची बहिण क्लास आलीच नाही,” असे सांगण्यात आले. भावाचे लक्ष नसल्याची संधी साधून बहिण तिथून बेपत्ता झाल्याचे समोर आले.
मुलाने सदरची माहिती तात्काळ आपल्या वडिलांना फोन करून दिली. मुलीच्या कुटुंबाने कुंजीरवाडी गाव, आजूबाजूचा परिसर आणि सर्व नातेवाईकांकडे मुलीचा शोध घेतला, परंतु तिचा कुठेही पत्ता लागला नाही. अखेर, अज्ञान वयाचा फायदा घेऊन कोणीतरी अज्ञात इसमाने तिला फुस लावून पळवून नेल्याची खात्री पटल्यानंतर वडिलांनी लोणी काळभोर पोलीस ठाण्यात धाव घेतली.
दरम्यान, याप्रकरणी अज्ञात इसमाविरुद्ध अपहरणाचा गुन्हा दाखल केला आहे. या घटनेमुळे कुंजीरवाडी परिसरात खळबळ उडाली असून पालकांमध्ये चिंतेचे वातावरण आहे. तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे करीत आहेत.
