पुणे: पुण्यातील भोसरी परिसरात पैशांच्या मागणी आणि मानसिक छळाला कंटाळून एका २६ वर्षीय दिव्यांग युवकाने आत्महत्या केल्याची धक्कादायक घटना समोर आली आहे. आत्महत्या करण्यापूर्वी युवकाने मोबाईलमध्ये व्हिडिओ रेकॉर्ड केला होता. या व्हिडिओमध्ये संबंधित महिला पैशांसाठी त्रास देत असल्याचे त्याने सांगितल्याचे पोलिस तपासात समोर आले आहे. या प्रकरणी भोसरी पोलिसांनी सरोज माने या महिलेला अटक केली आहे.
मृत युवकाचे नाव विनोद चौधरी असे असून, ही घटना २७ जुलै रोजी भोसरीतील डेस्टिनेशन क्षितिज सोसायटीमध्ये घडली. विनोदने सोसायटीच्या १२व्या मजल्यावरून उडी घेत आत्महत्या केली.
पोलिसांनी दिलेल्या माहितीनुसार, सरोज माने हिने विनोदवर सोन्याचे झुमके चोरी केल्याचा आरोप केला होता. त्यानंतर त्याच्याकडे एक लाख रुपयांची मागणी करण्यात आली. धमकीला घाबरून विनोदने कर्ज काढून संबंधित महिलेला एक लाख रुपये दिले. मात्र, त्यानंतरही त्याच्याकडे आणखी ५५ हजार रुपयांची मागणी करण्यात आल्याचा आणि त्याला धमक्या दिल्याचा आरोप आहे.
सततची पैशांची मागणी आणि मानसिक छळाला कंटाळून विनोदने टोकाचे पाऊल उचलल्याचे पोलिस तपासात समोर आले आहे. आत्महत्या करण्यापूर्वी त्याने मोबाईलमध्ये व्हिडिओ रेकॉर्ड केला होता. या व्हिडिओमध्ये संबंधित महिला पैशांसाठी त्रास देत असल्याचे त्याने सांगितल्याचे पोलिसांनी नमूद केले आहे.
ही घटना २७ जुलै रोजी घडली असली तरी याप्रकरणी ८ ऑगस्ट रोजी भोसरी पोलीस ठाण्यात संबंधित महिलेविरोधात गुन्हा दाखल करण्यात आला. त्यानंतर १७ ऑगस्ट रोजी पोलिसांनी सरोज माने हिला अटक केली.
या प्रकरणात सरोज माने हिच्याशिवाय आणखी कोणाचा सहभाग आहे का, पैशांची मागणी नेमकी कोणत्या कारणासाठी करण्यात आली आणि विनोदला कोणत्या प्रकारच्या धमक्या देण्यात आल्या, याचा तपास पोलिस करत आहेत. तसेच आत्महत्येपूर्वी विनोदने रेकॉर्ड केलेल्या व्हिडिओतील माहितीचीही पडताळणी केली जात आहे. या घटनेमुळे भोसरी परिसरात खळबळ उडाली असून, पोलिसांकडून प्रकरणाचा पुढील तपास सुरू आहे.
