पुणे : महाराष्ट्र शासनाच्या परिवहन विभागाने महाराष्ट्र मोटार वाहन नियम, १९८९ मध्ये महत्त्वपूर्ण सुधारणा केली आहे. त्यानुसार इलेक्ट्रॉनिक मीटर बसविलेल्या वाहनांच्या परमिटधारकांसह संबंधित वाहनचालकांना मराठी भाषेचे कार्यज्ञान असणे आता आवश्यक करण्यात आले आहे.
संबंधित चालकाकडे मराठी भाषेचे आवश्यक ज्ञान नसल्याचे आढळून आल्यास, परवाना प्राधिकरणाकडून त्याला मराठी भाषेचे ज्ञान संपादन करण्यासाठी एक महिन्याची मुदत देण्यात येणार आहे. या मुदतीत चालकाने आवश्यक भाषाज्ञान संपादन न केल्यास त्याला कारणे दाखवा नोटीस बजावण्यात येईल. त्यानंतर त्याच्या वाहनचालक परवान्यावरील अधिकृतता म्हणजेच बॅज किंवा ऑथरायझेशन तीन महिन्यांपर्यंत निलंबित करण्यात येणार आहे.
यानंतरही नियमांचे पालन न केल्यास संबंधित वाहनचालकाची अधिकृतता रद्द करण्याची कार्यवाही करण्यात येणार आहे. तसेच वाहनाच्या परमिटच्या नूतनीकरणाच्या वेळी परमिटधारकाला मराठी भाषेचे आवश्यक ज्ञान असल्याचे प्राधिकरणाच्या समाधानाप्रमाणे सिद्ध करणे बंधनकारक राहणार आहे.
संबंधित परमिटधारकांची मराठी भाषेची ज्ञानचाचणी प्रादेशिक परिवहन कार्यालयातील मोटार वाहन निरीक्षकांमार्फत घेण्यात येणार आहे. ही चाचणी उत्तीर्ण होणे संबंधित परमिटधारकांसाठी अनिवार्य राहणार आहे.
महाराष्ट्र शासनाच्या राजपत्रातील असाधारण भाग चार-अमध्ये १२ ऑगस्ट २०२६ रोजी या नियमांमधील सुधारणांची अधिसूचना प्रसिद्ध करण्यात आली आहे.
या सुधारणांची सर्व संबंधित परमिटधारक आणि वाहनचालकांनी नोंद घ्यावी, असे आवाहन प्रादेशिक परिवहन कार्यालय, पुणे यांच्याकडून करण्यात आले आहे.
