वेल्हा : अल्पवयीन मुलीला पेरू खायला देण्याचे आमिष दाखवून जुन्या शाळेच्या परिसरात नेऊन तिच्यावर लैंगिक अत्याचार केल्याप्रकरणी आरोपी आकाश हनुमंत इंगुळकर याला न्यायालयाने दोषी ठरवले आहे. पुणे येथील जिल्हा व अतिरिक्त सत्र न्यायालयाने आरोपीला पोक्सो कायद्याच्या कलम ६ अंतर्गत २० वर्षांची शिक्षा सुनावली आहे.
या प्रकरणी वेल्हा पोलीस ठाण्यात २०१९ मध्ये गुन्हा दाखल करण्यात आला होता. आरोपीने अल्पवयीन मुलीला पेरू खायला देण्याचे आमिष दाखवून आडवली गावातील जुन्या शाळेत नेले. तेथे त्याने तिच्यावर लैंगिक अत्याचार करण्याचा प्रयत्न केल्याचा आरोप होता. या प्रकारानंतर वेल्हा पोलीस ठाण्यात भारतीय दंड विधानातील कलम ३५४ (अ), ३७६ तसेच पोक्सो कायद्यातील कलम ४, ६, ८ आणि १२ अंतर्गत गुन्हा दाखल करण्यात आला.
या प्रकरणाचा तपास सहायक पोलीस निरीक्षक व्ही. एन. देवकर यांनी केला. तपास पूर्ण करून न्यायालयात आरोपपत्र दाखल करण्यात आले. खटल्याच्या सुनावणीदरम्यान सरकारी पक्षाकडून श्रीमती अरुंधती ब्रह्मे यांनी बाजू मांडली.
पुणे जिल्हा व अतिरिक्त सत्र न्यायालयाच्या विशेष न्यायालयाने आरोपीला पोक्सो कायद्याच्या कलम ६ अंतर्गत दोषी ठरवत २० वर्षांची शिक्षा आणि १० हजार रुपये दंड सुनावला. दंड न भरल्यास सहा महिन्यांची अतिरिक्त शिक्षा भोगावी लागणार आहे.
तसेच भारतीय दंड विधानाच्या कलम २६९ आणि २७० अंतर्गत आरोपीला सहा महिन्यांची शिक्षा आणि एक हजार रुपये दंड सुनावण्यात आला. दंड न भरल्यास एक महिन्याची अतिरिक्त शिक्षा भोगावी लागणार आहे.
या प्रकरणातील न्यायालयीन कामकाजासाठी वेल्हा पोलीस ठाण्याचे कोर्ट कर्मचारी एएसआय महेश कुमार कांबळे आणि एएसआय राहुल काळे यांनी काम पाहिले. समन्स अंमलदार म्हणून पोलीस कॉन्स्टेबल मयूर जगताप यांनी काम पाहिले. पुणे सेशन कोर्ट पैरवी अंमलदार म्हणून जीपीएसआय विद्याधर निचित, तर जिल्हा कोर्ट पैरवी अधिकारी म्हणून माधुरी तावरे यांनी काम पाहिले.
वेल्हा पोलीस ठाण्याचे वरिष्ठ पोलीस निरीक्षक किशोर शेवते यांच्या मार्गदर्शनाखाली या प्रकरणातील न्यायालयीन कामकाज पार पडले.
