छ्त्रपती संभाजीनगर : छ्त्रपती संभाजीनगरमधून एक धक्कादायक घटना समोर आली आहे. आपल्या कुत्र्याला वाचवण्यासाठी गेलेल्या वकिलाचा रेल्वेचा धक्का लागून मृत्यू झाला आहे. छत्रपती संभाजी नगर शहरातील संग्राम नगर उड्डाणपुलाखाली ही थरारक घटना घडली आहे. घटनेची माहिती मिळताच पोलिसांनी येथे धाव घेतली.
पोलिसांनी दिलेल्या अधिक माहितीनुसार, कासलीवारपुरम सोसायटीचे अध्यक्ष वकील लांडगे हे नेहमीप्रमाणे आपल्या कुत्र्याला फिरवण्यासाठी घराबाहेर पडले. कुत्र्यासह ते थेट संग्राम नगर उड्डाणपुलाखाली आले होते. येथे असलेल्या रेल्वे रुळांजवळ ते फिरत होते. चिकलठाणा कडून ट्रेन येत होती, वकील भाऊसाहेब यांनी ट्रेन येत असल्याचे पाहून रेल्वे रुळ झटकन क्रॉस केला. मात्र कुत्रा मागेच राहिला होता. कुत्रा तेथेच राहिला तर त्याचा जीव जाईल. त्यामुळे त्याला घेण्यासाठी भाऊसाहेब मागे वळले. तोपर्यंत रेल्वे जवळ आली होती. यात त्यांच्या डोक्याला रेल्वेचा मार लागला. त्यातच त्यांचा मृत्यू झाला. तर कुत्रा सुद्धा ट्रेनखाली चिरडला गेला.
एकाचवेळी मालक भाऊसाहेब लांडगे आणि त्यांच्या कुत्र्याचा जागीच मृत्यू झाला आहे. या घटनेने एकच खळबळ उडाली आहे. घटनेची माहिती पोलिसांना मिळताच त्यांनी घटनास्थळी धाव घेतली. त्यानंतर दोघांचे मृतदेह शवविच्छेदनासाठी ताब्यात घेतले आहे.
