बीड: मस्साजोगचे सरपंच संतोष देशमुख हत्या (Santosh Deshmukh Murder Case) प्रकरणातील सुनावणीदरम्यान आरोपींच्या वर्तनामुळे पुन्हा एकदा बीडमध्ये मोठी चर्चा (Beed News) रंगली आहे. या प्रकरणाची सुनावणी न्यायालयात पार पडली असून पुढील सुनावणी 4 जून रोजी होणार आहे. दरम्यान, व्हिडिओ कॉन्फरन्सिंगद्वारे हजर (Walmik Karad) करण्यात आलेल्या आरोपींच्या वर्तनावर संताप व्यक्त केला जात आहे.
मिळालेल्या माहितीनुसार, संतोष देशमुख हत्या प्रकरणातील सर्व आरोपींना सुनावणीसाठी व्हिडिओ कॉन्फरन्सिंगद्वारे न्यायालयासमोर हजर करण्यात आले होते. यावेळी काही आरोपींनी स्क्रीनसमोर कॉलर उडवून उद्धटपणे वागल्याचा आरोप करण्यात आला आहे. या प्रकारामुळे न्यायालयीन प्रक्रियेदरम्यान शिस्तीबाबत प्रश्न उपस्थित झाले आहेत.
या घटनेवर प्रतिक्रिया देताना संतोष देशमुख यांचे बंधू धनंजय देशमुख यांनी आरोपींच्या वर्तनावर नाराजी व्यक्त केली. आरोपींना त्यांच्या कृत्याचा कोणताही पश्चाताप नसल्याचे दिसून येत असल्याचे त्यांनी म्हटले. तसेच न्यायालयाने या प्रकाराची दखल घ्यावी, अशी मागणी त्यांनी केली आहे.
दरम्यान, या प्रकरणातील आरोपी जयराम चाटे याने दाखल केलेल्या जामीन अर्जावर आज सरकारी पक्षाने न्यायालयात आपले म्हणणे मांडले. दुसरीकडे, आरोपींच्या बाजूने काही प्रक्रियात्मक मुद्द्यांवर चर्चा झाल्याचे समोर आले आहे. सरकारी पक्षाचे वकील ॲड. बाळासाहेब कोल्हे यांनी काही अर्जांबाबत माहिती दिली असून संबंधित प्रक्रिया न्यायालयीन टप्प्यात असल्याचे स्पष्ट केले.
या प्रकरणातील आरोपींच्या वर्तनामुळे त्यांच्यावर अधिक कठोर कारवाईची मागणी पुन्हा जोर धरू लागली आहे. संतोष देशमुख हत्या प्रकरण राज्यभरात चर्चेत असून आता 4 जून रोजी होणाऱ्या पुढील सुनावणीकडे सर्वांचे लक्ष लागले आहे.
