सोलापूर: सोलापूरच्या चिंचोली एमआयडीसी परिसरात राज्य उत्पादन शुल्क विभागाने मोठी कारवाई करत बनावट देशी दारूचा कारखाना उद्ध्वस्त केला. अत्यंत गुप्तपणे आखलेल्या या मोहिमेत अधिकाऱ्यांनी तब्बल 2 कोटी 1 लाख 45 हजार 285 रुपयांचा मुद्देमाल जप्त केला. जप्त केलेल्या साहित्याचे प्रमाण इतके मोठे होते की त्याची मोजणी आणि पंचनामा पूर्ण करण्यासाठी तब्बल आठ तास लागले.
उत्पादन शुल्क विभागाला चिंचोली एमआयडीसी परिसरात बनावट दारू तयार केली जात असल्याची गुप्त माहिती मिळाली होती. त्यानंतर अधिकाऱ्यांनी सलग आठ दिवस परिसरावर गुप्त पाळत ठेवली. मुख्य आरोपींपर्यंत पोहोचण्यासाठी काही अधिकाऱ्यांनी रात्री कारखान्यांच्या छतांवर थांबून हालचालींवर लक्ष ठेवले. दिवस-रात्र निरीक्षण केल्यानंतर अखेर छाप्याची कारवाई करण्यात आली.
कारवाईदरम्यान अधिकाऱ्यांनी एकाच वेळी तीन ठिकाणी छापे टाकले. पहिल्या ठिकाणी रिकामे बॉक्स आढळले. मात्र संशय कायम असल्याने तपास सुरू ठेवण्यात आला. दुसऱ्या ठिकाणी मोठ्या प्रमाणावर स्पिरीटचा साठा सापडला. त्यानंतर तिसऱ्या ठिकाणी पोहोचल्यावर बनावट दारू तयार करण्यासाठी वापरला जाणारा अत्याधुनिक ऑटोमॅटिक बॉटलिंग प्लांट सुरू असल्याचे आढळून आले.
या कारखान्यातून ऑटोमॅटिक बॉटलिंग मशीन, प्लास्टिकच्या बाटल्या, बनावट लेबले, बुच, ब्लेंड, स्मॉल इंजेक्ट प्रिंटर, आरओ प्लांट, जनरेटर, इलेक्ट्रिक मोटर तसेच माल वाहतुकीसाठी वापरण्यात येणारी चारचाकी आणि दुचाकी वाहने असा मोठा साठा जप्त करण्यात आला. सर्व साहित्याची तपासणी, मोजणी आणि पंचनामा करण्यासाठी अधिकाऱ्यांना सलग आठ तास काम करावे लागले.
या कारवाईमुळे बनावट दारूच्या अवैध व्यवसायाला मोठा धक्का बसला असून, या रॅकेटमध्ये आणखी कोणाचा सहभाग आहे, याचा शोध उत्पादन शुल्क विभाग घेत आहे. संबंधित आरोपी आणि या नेटवर्कशी संबंधित इतर व्यक्तींचा शोध घेण्यासाठी तपास सुरू असून, पुढील कारवाई सुरू असल्याचे अधिकाऱ्यांनी सांगितले.
