ठाणे: हिंदी वेबसीरिज आणि भोजपुरी चित्रपटांमध्ये काम केलेल्या एका अभिनेत्रीला ठाणे पोलिसांनी वेश्याव्यवसायाशी संबंधित प्रकरणात अटक केली आहे. ठाणे पोलिसांच्या अनैतिक मानवी वाहतूक प्रतिबंधक कक्षाने ही कारवाई केली. पोलिसांच्या म्हणण्यानुसार, या कारवाईदरम्यान दोन तरुणींचीही सुटका करण्यात आली आहे.
पोलिसांना मिळालेल्या गुप्त माहितीनंतर वागळे इस्टेट परिसरातील एका बार आणि रेस्टॉरंटवर लक्ष ठेवण्यात आले होते. संबंधित अभिनेत्रीही काही महिला आणि तरुणींना घेऊन तिथे येणार असल्याची माहिती पोलिसांना मिळाली होती. त्यानंतर पोलिसांच्या पथकाने परिसरात सापळा रचला.
अभिनेत्री तरुणींसह संबंधित ठिकाणी पोहोचताच पोलिसांनी कारवाई केली. त्यानंतर तिला ताब्यात घेण्यात आले. या कारवाईत दोन तरुणींची सुटका करण्यात आल्याचे पोलिसांनी सांगितले आहे. त्यांना सुरक्षित ठिकाणी हलवण्यात आले असून, त्यांच्याबाबत पुढील प्रक्रिया केली जात आहे.
पोलिसांच्या प्राथमिक तपासानुसार, अटक करण्यात आलेल्या अभिनेत्रीने 10 हून अधिक हिंदी वेबसीरिज तसेच 3 भोजपुरी चित्रपटांमध्ये भूमिका केल्याची माहिती तपासातून समोर आल्याचे सांगण्यात आले आहे.
दरम्यान, या प्रकरणाचा तपास आता अधिक व्यापक करण्यात आला आहे. या कथित रॅकेटमध्ये आणखी कोणाचा सहभाग आहे का, तसेच इतर व्यक्ती किंवा दलालांची भूमिका आहे का, याचा शोध पोलीस घेत आहेत. अभिनेत्रीची चौकशी करून या प्रकरणाशी संबंधित इतर माहिती मिळवण्याचा प्रयत्न केला जात आहे.
या प्रकरणातील आरोप आणि पोलिसांच्या तपासातून समोर येणारी माहिती याबाबत पुढील कारवाईनंतर अधिक स्पष्टता येणार आहे. ठाणे पोलिसांकडून या संपूर्ण प्रकरणाचा तपास सुरू आहे.
