पुणे: पुण्यातील कर्वेनगर परिसरात लग्नास नकार दिल्याच्या रागातून एका तरुणाने सहकारी तरुणीवर धारदार शस्त्राने हल्ला केल्याची घटना घडली आहे. या हल्ल्यात 23 वर्षीय तरुणी जखमी झाली असून तिच्यावर रुग्णालयात उपचार सुरू आहेत. वारजे माळवाडी पोलिसांनी आरोपीविरुद्ध गुन्हा दाखल करून त्याचा शोध सुरू केला आहे.
पोलिसांनी दिलेल्या माहितीनुसार, जखमी तरुणी आणि आरोपी गणेश शरद रोकडे (वय 28, रा. आकाशनगर, वारजे) हे एका खासगी बँकेत एकत्र काम करत होते. एकाच कार्यालयात काम करत असल्याने दोघांची ओळख झाली होती. या परिचयातून आरोपीने तरुणीला लग्नाची मागणी घातली होती. मात्र, तरुणीने त्याचा प्रस्ताव नाकारला होता. याचाच राग आरोपीच्या मनात होता, असा पोलिसांचा प्राथमिक अंदाज आहे.
30 जुलै रोजी सायंकाळी बँक सुटल्यानंतर आरोपीने तरुणीला बोलायचे असल्याचे सांगत दुचाकीवरून कर्वेनगरमधील डी. पी. रोडवरील दुधाने लॉन्स परिसरात नेले. तेथे दोघांमध्ये वाद झाला. वादाच्या भरात आरोपीने त्याच्याजवळील धारदार शस्त्र काढून तरुणीवर हल्ला केला.
या हल्ल्यात तरुणीच्या हनुवटीवर आणि हातावर गंभीर जखमा झाल्या. घटनेनंतर आरोपी घटनास्थळावरून फरार झाला. जखमी तरुणीला तातडीने रुग्णालयात दाखल करण्यात आले असून तिची प्रकृती स्थिर असल्याची माहिती मिळाली आहे.
या प्रकरणी पीडित तरुणीच्या फिर्यादीवरून वारजे माळवाडी पोलीस ठाण्यात गणेश शरद रोकडे याच्याविरुद्ध गुन्हा दाखल करण्यात आला आहे. आरोपीचा शोध घेण्यासाठी पोलिसांकडून विविध पथके कामाला लागली असून पोलीस उपनिरीक्षक गणेश दीक्षित या प्रकरणाचा पुढील तपास करत आहेत.
