पुणे: पुण्यातील नसरापूर अत्याचार प्रकरणाच्या न्यायालयीन प्रक्रियेला अखेर सुरुवात झाली असून आज या खटल्याची प्राथमिक सुनावणी पार पडली. या प्रकरणात पुणे ग्रामीण पोलिसांनी यापूर्वीच 1100 पानांचे दोषारोपपत्र न्यायालयात दाखल केले आहे. त्यामुळे या संवेदनशील प्रकरणाकडे संपूर्ण जिल्ह्याचे लक्ष लागले आहे.
मिळालेल्या माहितीनुसार, मुख्य आरोपीला आज सुरक्षा आणि तांत्रिक कारणांमुळे व्हिडिओ कॉन्फरन्सिंगद्वारे न्यायालयासमोर हजर करण्यात आले. सुनावणीदरम्यान तपास अधिकाऱ्यांनी न्यायालयासमोर दोन महत्त्वाचे अर्ज सादर केले.
यामध्ये पीडित आणि साक्षीदारांच्या माध्यमातून आरोपीची अधिकृत ओळख पटवण्यासाठी ओळख परेड घेण्याची परवानगी मागण्यात आली. तसेच आरोपीची मानसिक स्थिती तपासण्यासाठी वैद्यकीय मानसिक चाचणी करण्याची विनंतीही पोलिसांकडून करण्यात आली होती.
न्यायालयाने दोन्ही अर्ज विचारात घेत पोलिसांची मागणी मान्य केली आहे. त्यानुसार आता आरोपीची मानसिक वैद्यकीय तपासणी केली जाणार आहे. तसेच न्यायालयाने कायदेशीर प्रक्रियेचा भाग म्हणून आरोपीला वकील उपलब्ध करून देण्याचे निर्देशही दिले आहेत.
या प्रकरणात आज प्राथमिक कायदेशीर प्रक्रिया आणि अर्जांवर सुनावणी झाली. नियमित सुनावणी आता 28 मेपासून सुरू होणार असल्याचे न्यायालयाने स्पष्ट केले आहे.
दरम्यान, पुणे ग्रामीण पोलिसांनी अवघ्या 15 दिवसांत या प्रकरणात सखोल तपास पूर्ण करत 1100 पानांचे आरोपपत्र दाखल केले आहे. या आरोपपत्रात 50 हून अधिक साक्षीदारांचे जबाब, वैद्यकीय पुरावे, घटनास्थळाचे फोटो, काही व्हिडिओ, न्यायवैद्यक प्रयोगशाळेचा अहवाल आणि तांत्रिक पुरावे जोडण्यात आले आहेत.
या खटल्याच्या पुढील सुनावणीकडे सर्वांचे लक्ष लागले असून पीडितेला लवकर न्याय मिळावा, अशी मागणी नागरिकांकडून केली जात आहे.
