पुणे: पुणे-दौंड लोहमार्गावरील लोणी काळभोर रेल्वे स्थानकावर तांत्रिक बिघाडामुळे डेमो ट्रेन एक तासाहून अधिक काळ ठप्प राहिल्याने शेकडो प्रवाशांचे प्रचंड हाल झाले. गुरुवारी रात्री साडेनऊच्या सुमारास ही घटना घडली असून रोज कामासाठी प्रवास करणारे नोकरदार, विद्यार्थी आणि महिला प्रवासी मोठ्या अडचणीत सापडले. या प्रकारामुळे प्रवाशांमध्ये तीव्र नाराजी व्यक्त केली जात आहे.
मिळालेल्या माहितीनुसार, पुणे-दौंड डेमो ट्रेन लोणी काळभोर रेल्वे स्थानकावर तांत्रिक कारणामुळे अचानक बंद पडली. प्राथमिक माहितीनुसार, रेल्वेच्या एका डब्याचे ब्रेक जाम झाल्याने गाडी पुढे जाऊ शकली नाही. त्यामुळे ट्रेन दीर्घकाळ स्थानकावरच थांबून राहिली.
या बिघाडामुळे शेकडो प्रवासी रेल्वेमध्ये आणि स्थानकावर अडकून पडले. विशेषतः रोज कामावरून घरी परतणारे नोकरदार, विद्यार्थी आणि महिला प्रवाशांना मोठा त्रास सहन करावा लागला. रात्री उशीर होत असल्याने अनेक महिला प्रवाशांमध्ये अस्वस्थता आणि चिंता निर्माण झाली.
काही प्रवाशांनी रेल्वेची प्रतीक्षा न करता पुणे-सोलापूर महामार्गाचा वापर करून बस आणि इतर वाहनांचा पर्याय स्वीकारला. मात्र अनेक जणांना एक तासाहून अधिक काळ कोणतीही स्पष्ट माहिती किंवा पर्यायी व्यवस्था न मिळाल्याने स्थानकावरच थांबावे लागले.
प्रवाशांनी रेल्वे प्रशासनावर गंभीर नाराजी व्यक्त करत, पुण्याहून डेमो गाडी सुटण्यापूर्वी तिची तांत्रिक तपासणी आणि फिटनेस तपासणे आवश्यक होते, असा सवाल उपस्थित केला आहे. अवघ्या तिसऱ्याच स्थानकावर गाडी बंद पडल्याने देखभाल आणि तपासणी प्रक्रियेवर प्रश्नचिन्ह निर्माण झाले आहे. यासाठी रेल्वे प्रशासन जबाबदार असल्याची भावना प्रवाशांमधून व्यक्त होत आहे.
दरम्यान, तांत्रिक बिघाड दूर करण्याचे प्रयत्न सुरू असल्याची माहिती मिळत आहे. मात्र या घटनेमुळे दैनंदिन प्रवाशांना मोठा मनस्ताप सहन करावा लागला असून रेल्वे प्रशासनाच्या नियोजन आणि कार्यपद्धतीवर प्रश्न उपस्थित होत आहेत.
