पुणे : खराडी परिसरातील साडेचौदा वर्षांच्या अनाथ अल्पवयीन मुलीचा विवाह लावून दिल्याप्रकरणी खराडी पोलिसांनी पतीसह नऊ जणांविरुद्ध गुन्हा दाखल केला आहे. बालविवाह प्रतिबंधक कायद्यानुसार ही कारवाई करण्यात आली असून प्रकरणाचा पुढील तपास सुरू आहे.
या प्रकरणात कृष्णा माधव कांबळे (वय 27, रा. चंदननगर) याच्यासह त्याच्या कुटुंबीय आणि नातेवाईकांविरोधात गुन्हा नोंदविण्यात आला आहे. यामध्ये सुरज गणपत कांबळे, शांताबाई गणपत कांबळे, अमोल गणपत कांबळे, योगेश काकासाहेब टेकाळे, रुक्मिणी मारुती कांबळे, मोनिका नरसिंग कांबळे आणि संजना मारुती कांबळे यांचा समावेश आहे.
याबाबत एका अंगणवाडी सेविकेने खराडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, खराडी परिसरात राहणाऱ्या अल्पवयीन मुलीचा 28 मार्च 2025 रोजी विवाह करण्यात आला होता. संबंधित मुलगी साडेचौदा वर्षांची असून तिचे आई-वडील नसल्याचे तपासात समोर आले आहे.
या विवाहाची माहिती जिल्हा बाल संरक्षण अधिकारी आणि महिला व बाल विकास विभागाकडे पत्राद्वारे पोहोचली होती. त्यानंतर चाइल्ड हेल्पलाईनच्या स्वयंसेवकांनी आणि संबंधित अधिकाऱ्यांनी चौकशी सुरू केली. तपासादरम्यान मुलगी विवाहाच्या वेळी अल्पवयीन असल्याचे स्पष्ट झाले.
चौकशीनंतर मुलीचा बालविवाह झाल्याचे निष्पन्न झाल्याने संबंधित तरुण, त्याचे कुटुंबीय आणि विवाहासाठी मदत करणाऱ्या नातेवाईकांविरुद्ध कारवाई करण्यात आली. या प्रकरणी बालविवाह प्रतिबंध अधिनियम 2006 मधील कलम 9, 10 आणि 11 अन्वये गुन्हा दाखल करण्यात आला आहे.
या घटनेमुळे बालविवाहाच्या प्रश्नाकडे पुन्हा एकदा लक्ष वेधले गेले असून अल्पवयीन मुलांच्या संरक्षणासाठी संबंधित यंत्रणांनी अधिक सतर्क राहण्याची गरज व्यक्त केली जात आहे. प्रकरणाचा पुढील तपास सहाय्यक पोलीस निरीक्षक मीरा चव्हाण करीत आहेत.
