पुणे : कॉकरोच जनता पार्टीच्या गुरुवारी होणाऱ्या आंदोलनाच्या पार्श्वभूमीवर पुणे पोलिसांनी विशेष बंदोबस्ताची तयारी केली आहे. कायदा आणि सुव्यवस्था अबाधित राखण्यासाठी तसेच आंदोलनादरम्यान घडणाऱ्या प्रत्येक घडामोडीवर लक्ष ठेवण्यासाठी मोठ्या प्रमाणावर व्हिडिओ चित्रीकरणाची व्यवस्था करण्यात आली आहे.
कॉकरोच जनता पार्टीचे संस्थापक अभिजित दीपके यांच्या नेतृत्वाखाली 11 जून रोजी दुपारी 4 वाजता सावित्रीबाई फुले पुणे विद्यापीठ परिसरात आंदोलन होणार आहे. दिल्लीतील आंदोलनानंतर पुण्यात आयोजित करण्यात आलेले हे पक्षाचे दुसरे मोठे आंदोलन मानले जात आहे.
या आंदोलनात मोठ्या संख्येने विद्यार्थी आणि तरुण सहभागी होण्याची शक्यता व्यक्त केली जात आहे. पुणे हे स्पर्धा परीक्षा आणि उच्च शिक्षणासाठी देशभरातील विद्यार्थ्यांचे प्रमुख केंद्र असल्याने आंदोलनाला 3 ते 4 हजार तरुण उपस्थित राहू शकतात, असा अंदाज वर्तवला जात आहे.
संभाव्य गर्दी आणि सुरक्षेच्या दृष्टीने पुणे पोलिसांनी विशेष नियोजन केले आहे. आंदोलनस्थळाच्या सर्व बाजूंचे चित्रीकरण करण्यासाठी स्वतंत्र व्हिडिओ कॅमेरे तैनात करण्यात येणार आहेत. यासाठी शहरातील विविध पोलीस ठाणे आणि वाहतूक शाखेत कार्यरत असलेल्या व्हिडिओ कॅमेरामन आणि कर्मचाऱ्यांची मदत घेण्यात आली आहे.
एकूण 21 व्हिडिओ कॅमेरामनांची विशेष नियुक्ती करण्यात आली असून आंदोलनातील प्रत्येक हालचालीवर बारकाईने नजर ठेवली जाणार आहे. शहरातील विविध विभागांमधील कर्मचारी एकत्र करून अशा प्रकारे डिजिटल पद्धतीने बंदोबस्त उभारण्याची ही दुर्मिळ घटना मानली जात आहे.
पोलीस उपायुक्त चिलुमुला रजनीकांत यांनी सांगितले की, आंदोलन शांततेत पार पडावे आणि कोणताही कायदा व सुव्यवस्थेचा प्रश्न निर्माण होऊ नये यासाठी सर्व आवश्यक तयारी करण्यात आली आहे. त्याचबरोबर संपूर्ण कार्यक्रमाचे व्हिडिओ चित्रीकरण करण्यात येणार असून परिस्थितीवर सतत लक्ष ठेवले जाईल.
दरम्यान, सोशल मीडियाच्या माध्यमातून पुढे आलेल्या या आंदोलनाकडे विद्यार्थी, पालक आणि प्रशासनाचे लक्ष लागले असून आंदोलनाला नेमका किती प्रतिसाद मिळतो, याची उत्सुकता निर्माण झाली आहे.
