लोणी काळभोर : पर्यावरण संवर्धन, जैवविविधतेचे जतन आणि हरित क्षेत्रात वाढ करण्याच्या उद्देशाने वनविभागामार्फत धानोरी (ता. हवेली, जि. पुणे) येथील राखीव वनक्षेत्रातील सर्व्हे क्रमांक 69 मध्ये ‘अटल घन वृक्ष लागवड (मियावाकी)’ प्रकल्पांतर्गत स्थानिक प्रजातींच्या वृक्ष लागवडीचा महत्त्वाकांक्षी उपक्रम राबविण्यात आला.
या उपक्रमाला विद्यमान आमदार बाप्पूसाहेब पठारे तसेच परिसरातील आजी-माजी लोकप्रतिनिधींची उपस्थिती लाभली. वनसंरक्षक (पुणे वनवृत्त) आशिष ठाकरे, उपवनसंरक्षक अभिजीत वायकोस, विभागीय वनाधिकारी (दक्षता) अमोल थोरात आणि सहाय्यक वनसंरक्षक विशाल चव्हाण यांच्या मार्गदर्शनाखाली वृक्षारोपणाची अंमलबजावणी करण्यात आली.
यावेळी वनपरिक्षेत्र अधिकारी नंदकिशोर पाटील, वनपाल शितल खंडके, वनरक्षक एस. बी. गायकवाड, प्रिया आकेन तसेच वनसेवक लक्ष्मण टिंगरे आणि त्यांच्या अधिनस्त पथकाने नियोजनबद्ध पद्धतीने स्थानिक प्रजातींची वृक्ष लागवड केली.
वनविभागाने राबविलेला हा मियावाकी पद्धतीवरील वृक्षारोपण उपक्रम भविष्यात दाट, समृद्ध आणि जैवविविधतेने नटलेले वनक्षेत्र निर्माण करण्यासाठी महत्त्वाचा ठरणार असून, पर्यावरण संतुलन राखण्यास आणि नागरिकांना स्वच्छ, निरोगी वातावरण उपलब्ध करून देण्यास हातभार लावणार आहे. स्थानिक नागरिकांनीही या उपक्रमाचे स्वागत करत अशा हरित मोहिमा सातत्याने राबविण्याची अपेक्षा व्यक्त केली आहे .
