पुणे : कात्रज बायपास रस्त्यावरील नवले पुलाखाली मध्यरात्री भीषण अपघात घडला. भरधाव वेगातील सिमेंट टँकर चालकाचे नियंत्रण सुटल्याने रस्त्यावर उलटला. या दुर्घटनेत एका दुचाकीस्वार डिलिव्हरी बॉयचा जागीच मृत्यू झाला असून 3 ते 4 जण गंभीर जखमी झाले आहेत.
मृत व्यक्तीचे नाव रामेश्वर मच्छिंद्र उगले असे असून ते डिलिव्हरी बॉय म्हणून काम करत होते. अपघाताच्या वेळी ते कामावर असताना या दुर्घटनेचे बळी ठरले.
प्राथमिक माहितीनुसार, सिमेंटने भरलेला 10 टायरचा अवजड टँकर कात्रज बायपास मार्गावरून जात होता. नवले पुलाखालील वळणाजवळ आल्यानंतर चालकाचा वाहनावरील ताबा सुटला. त्यानंतर टँकर रस्त्यावर उलटला आणि त्याचवेळी तेथून जाणाऱ्या दुचाकीला जोरदार धडक बसली. धडकेनंतर दुचाकी टँकरखाली अडकल्याने रामेश्वर उगले यांचा जागीच मृत्यू झाला.
या अपघातात इतर 3 ते 4 जण जखमी झाले असून त्यांना उपचारासाठी रुग्णालयात दाखल करण्यात आले आहे. काही जखमींची प्रकृती गंभीर असल्याची माहिती समोर आली आहे.
घटनेची माहिती मिळताच पोलीस आणि आपत्कालीन यंत्रणा तातडीने घटनास्थळी दाखल झाल्या. पोलिसांनी टँकर चालकाला ताब्यात घेतले असून त्याच्याविरुद्ध गुन्हा दाखल करण्यात आला आहे. अपघाताचे नेमके कारण आणि टँकरचा वेग याबाबत अधिक तपास सुरू आहे.
दरम्यान, अपघातानंतर कात्रज बायपास मार्गावरील वाहतूक काही काळासाठी विस्कळीत झाली होती. रस्त्यावर उलटलेला टँकर हटविण्यासाठी क्रेनची मदत घेण्यात आली. पोलिस आणि प्रशासनाने सुमारे 2 ते 3 तास प्रयत्न करून वाहतूक सुरळीत केली.
या घटनेचा सीसीटीव्ही फुटेजही समोर आला असून अपघाताची तीव्रता त्यातून दिसून येत आहे. नवले पूल परिसरात वारंवार अपघात होत असल्याने हा भाग अपघातप्रवण ठरत असल्याची चर्चा पुन्हा एकदा सुरू झाली आहे. स्थानिक नागरिकांनी या ठिकाणी कायमस्वरूपी उपाययोजना करण्याची मागणी केली आहे. पोलीस पुढील तपास करीत आहेत.
