सिडको : अंबड परिसरातील 17 वर्षीय अल्पवयीन मुलीवर अज्ञात व्यक्तीने लैंगिक अत्याचार केल्याचा प्रकार समोर आला. ही पीडिता सहा आठवड्यांची गर्भवती असल्याची धक्कादायक बाब तपासणीदरम्यान उघडकीस आली.
पीडित मुलगी सातपूर येथील कामगार रुग्णालयात डोकेदुखी व श्वास घेण्यास त्रास होत असल्यामुळे उपचारासाठी दाखल झाली होती. दोन-तीन दिवस उपचार करूनही तिला त्रास होतच असल्याने वैद्यकीय अधिकाऱ्यांनी तिची प्रेग्नन्सी टेस्ट केली. ही टेस्ट पॉझिटिव्ह आल्याने डॉक्टरांनी तिची सोनोग्राफी केली असता पीडिता सहा आठवड्यांची गर्भवती असल्याचे निदर्शनास आले.
फिर्यादींनी तिला विश्वासात घेऊन तिची विचारपूस केली असता ती घाबरल्याने काहीच बोलत नव्हती. महिला व बालकल्याण समितीच्या समुपदेशन कार्यकर्त्यांनीही तिच्याकडे चौकशी केली. मात्र, ती अत्याचार करणाऱ्याबाबत कोणतीही माहिती देऊ शकली नाही.
दरम्यान, हा प्रकार ऑगस्ट 2023 ते एप्रिल 2024 दरम्यान झाला असावा, असा संशय पोलिसांनी व्यक्त केला. याप्रकरणी अंबड पोलीस ठाण्यात अज्ञात व्यक्तीविरुद्ध गुन्हा दाखल करण्यात आला असून, अधिक तपास सुरु आहे.
