छत्रपती संभाजीनगर: पैठण रस्त्यावरील वाल्मी नाकाजवळ शुक्रवारी सायंकाळी साडेसात वाजता भीषण अपघात झाला. सोलापूरकडून धुळ्याच्या दिशेने जाणारा सुसाट ट्रक वाहतूक खोळंबल्याने थांबलेल्या वाहनांना उडवत गेला. या विचित्र अपघातात एक ठार तर सात जखमी झाले आहेत. जखमींमधील तिघांची प्रकृती चिंताजनक असल्याची प्राथमिक माहिती आहे. शुक्रवारी साडेसात वाजण्याच्या सुमारास ही भीषण अपघात झाला आहे.
मिळालेल्या माहितीनुसार, सोलापूर-धुळे महामार्गावरून वाल्मीनजीकच्या पुलाखालून जाण्यासाठी एक ट्रक भरधाव वेगात उतारावरून आला. चालकाचे ट्रकवरील नियंत्रण सुटल्याने भरधाव वेगात पाच ते सहा वाहनांना धडक देत पुढे आला. यामध्ये चार ते पाच दुचाकी, दोन-तीन कार, एक रिक्षा अशा वाहनांना धडक दिली. यामध्ये एक दुचाकी कार ट्रकमध्ये चिरडली गेली.
यातील एक जण ठार झाला आहे. तर अन्य एक जण गंभीर जखमी झाला आहे. इतरही वाहनांवरील काहीजण जखमी झाले असून सातपैकी तिघांची प्रकृती चिंताजनक असल्याची प्राथमिक माहिती आहे. अपघातानंतर सातारा ठाण्याच्या पोलिसांनी घटनास्थळी धाव घेत जखमींना घाटीमध्ये हलवण्यात आले.
