छत्रपती संभाजीनगर: छत्रपती संभाजीनगरमधून एक अत्यंत लाजिरवाणी घटना समोर आली आहे. पोलीस उपायुक्त कार्यालयात ‘वाचक’ म्हणून कार्यरत असलेल्या एका ५३ वर्षीय पोलीस उपनिरीक्षकावर (PSI) एका शिक्षिकेचे लैंगिक शोषण केल्याचा ठपका ठेवण्यात आला आहे. या धक्कादायक प्रकारामुळे पोलीस दलाची प्रतिमा मलीन झाली असून, पीडितेच्या तक्रारीनंतर जवाहरनगर पोलीस ठाण्यात संबंधित अधिकाऱ्याविरुद्ध गुन्हा दाखल करण्यात आला आहे. सध्या हा पोलीस अधिकारी फरार असून पोलीस त्याचा शोध घेत आहेत.
पीडित महिला एका खासगी शाळेत शिक्षिका म्हणून काम करते. हरीश खटावकर असे या आरोपीचे नाव असून, त्याची आणि पीडितेची ओळख ४ वर्षांपूर्वी झाली होती. आरोपीने मे २०२५ ते १५ जुलै २०२६ या कालावधीत, हॉटेलचे काम असल्याचे सांगून किंवा घराचे इंटेरियर दाखवण्याच्या नावाखाली महिलेला बोलावून तिच्यावर वारंवार अत्याचार केले. पीडितेने या कृत्यांना विरोध करण्याचा प्रयत्न केला असता, आरोपीने तुझ्या पतीला सांगून बदनामी करेल असे सांगून तिला गप्प राहण्यास भाग पाडले.
हा प्रकार तेव्हा उघडकीस आला, जेव्हा पतीला आरोपीने पीडितेच्या मोबाईलवर पाठवलेले मेसेज दिसले. पतीने जाब विचारला असता, खटावकरने अत्यंत उद्धटपणे “माझे तिच्यावर प्रेम आहे,” असे उत्तर दिले. बुधवारी सायंकाळी ७ च्या सुमारास आरोपीने थेट पीडितेच्या घरी जाऊन तिला बळजबरीने गाडीत बसवले. प्रवासादरम्यान तिला मारहाण केली आणि रात्री १० वाजण्याच्या सुमारास दूध डेअरी चौकात उतरवून तिचा मोबाईल हिसकावून तो पसार झाला.
हरीश खटावकर हा १९९३ पासून पोलीस दलात सेवा देत आहे. विशेष म्हणजे, ११ वर्षांपूर्वी देखील त्याने एका महिलेशी असभ्य वर्तन केल्यामुळे त्याला निलंबित करण्यात आले होते. पोलीस आयुक्त प्रवीण पवार यांना या गंभीर प्रकरणाचा अहवाल देण्यात आला असून, लवकरच कायदेशीर कडक कारवाई केली जाईल, असे पोलिसांकडून स्पष्ट करण्यात आले आहे.
