जालना: मराठा आरक्षणासाठी जालना जिल्ह्यातील अंतरावाली-सराटी गावात मनोज जरांगे पाटील यांच्या आंदोलनाचा आजचा सहावा दिवस आहे. या गावात आंदोलक तिथे मोठ्या प्रमाणावर जमले आहेत. या सर्व आंदोलकांनी मनोज जरांगेंना पाणी प्या, अशा घोषणा करून आवाहन केले. यावर बोलताना जरांगे म्हणाले की, पाणी पिले तर आपल्याला आरक्षण कसे मिळणार? राज्य सरकारला एखादा बळी घ्यायचा असेल तर घेऊ द्या, असे ते म्हणाले. आता न्यायाचा दिवस जवळ आला आहे. मला माझ्या समाजापेक्षा कोणी मोठे नाही, असे सांगत मनोज जरांगे पाटील भावूक झाले. यानंतर तेथील आंदोलकांनी पाणी प्या, पाणी प्या अशा जोरदार घोषणा देत जरांगेंना पाणी पिण्याचे आवाहन केले. त्यानंतर जरांगे पाटील भावूक झाले व त्यांनी पाणी पिण्यासाठी होकार दिला.
यावेळी बोलताना जरांगे पाटलांनी आपल्याला महसूलमंत्री राधाकृष्ण विखे पाटलांचा फोन आलेल्याचे सांगितले. ज्यांचे पुरावे मिळालेत त्यांनाच नाही तर सरसकट सर्व मराठ्यांना आरक्षण द्यावे, प्रमाणपत्र द्यावे. पुरावे असलेल्यांनाच प्रमाणपत्र देण्यास आमचा नकार आहे. मी आंदोलन थांबविणार नाही, असे विखे पाटलांना फोनवरून सांगितले आहे, असे जरांगे पाटील म्हणाले.
आमदार प्रकाश सोळंके यापुढे सोसायटीतही निवडूण येणार नाहीत. पोलिसांनी मराठा आंदोलकांना त्रास देऊ नये. मराठा कुठेही भरकटत नाही, आमचे आंदोलन हे शांततेत सुरु आहे, असे मनोज जरांगे पाटील म्हणाले. याबरोबरच मुख्यमंत्र्यांनी वाचाळ नेत्यांना आवरावे. जर आमच्या वाटेला गेलात तर मराठे कोणालाही सोडणार नाहीत, असा इशारा जरांगे पाटलांनी दिला आहे.
