मुंबई : राष्ट्रवादीचे (अजित पवार गट) आमदार प्रकाश सोळंके यांच्या व्हायरल ऑडिओ क्लिपवरून मराठा आंदोलक आक्रमक झाले असून, त्यांच्या घरावर दगडफेक करण्यात आली. आक्रमक झालेल्या आंदोलकांनी बंगल्याच्या आवारात उभ्या असलेल्या गाड्याही पेटवल्या. आता पोलिस अॅक्शन मोडमध्ये आले असून, आमदार प्रकाश सोळंके यांच्याशी संवाद साधणाऱ्या सुंदर भोसलेला ताब्यात घेतले आहे.
मराठा आंदोलकाने आमदार प्रकाश सोळंकेंना फोन करून ४० दिवसांची मुदत संपल्याची आठवण करुन दिली. या वेळी आंदोलकाशी चर्चा करताना प्रकाश सोळंके म्हणाले की, “४० दिवस झाले म्हणून काय झालं? आरक्षण देऊन कोर्टात अडकवून ठेवायचं का परत? अशी आडमुठी भूमिका घेऊन चालत नाही, शासन देण्याचा प्रयत्न करत आहे. फक्त दिलेलं आरक्षण कोर्टात टिकलं पाहिजे, एवढंच शासनाचं म्हणणं आहे. त्यादृष्टीनं जे काही आवश्यक आहे, ते सर्व शासन करतंय. शासनानं समिती नेमली आहे, त्या समितीचा अहवाल घेऊन शासन आरक्षण देणार आहे. कोण म्हटलं सरकार आरक्षण देत नाही?” असा प्रश्न सोळंके यांनी उपस्थित केला आहे.
दरम्यान, याच ऑडिओ क्लिपमध्ये बोलताना आमदार प्रकाश सोळंके यांनी मराठा आंदोलक मनोज जरांगे पाटील यांच्याबाबत वक्तव्य केले होते. त्याच वक्तव्यावरून गोंधळ उडाला आहे. ऑडिओ क्लिप व्हायरल झाल्यामुळे सोळंके यांच्या बंगल्यावर जमाव दगडफेक करत जाळपोळ करत होता. सुमारे एक ते दीड तास दगडफेक सुरू होती. सोळंकेंच्या बंगल्यातून धुराचे लोळ येत असल्याचे पाहायला मिळत होते. त्यावेळी आमदार सोळंके घरातच उपस्थित होते.
याप्रकरणी धारूर तालुक्यातील धूनकवड येथील रहिवासी असलेल्या सुंदर भोसले या तरुणाला रात्री उशिरा माजलगाव पोलिसांनी घरातून ताब्यात घेतले आहे.
