मुंबई: राष्ट्रवादी काँग्रेस पक्षविरोधी कारवाई केल्याप्रकरणी खासदार सुप्रिया सुळे, श्रीनिवास पाटील आणि मोहम्मद फैजल यांच्या विरोधात कारवाई करण्याची मागणी निवडणूक आयोगाकडे केल्याची माहिती अजित पवार गटाचे खासदार आनंदी प्रदेशाध्यक्ष सुनील तटकरे यांनी दिली आहे. खासदार अमोल कोल्हे यांनी अजित पवारांना समर्थन दिलं आहे, तसे प्रतिज्ञापत्रक त्यांनी दिल्याची माहितीही तटकरेंनी दिली. ते आज मुंबईत माध्यमांशी बोलत होते.
पक्षांतर बंदीचे उल्लंघन केल्याप्रकरणी खासदार सुनील तटकरे यांच्यावर कारवाई करावी, अशी मागणी राष्ट्रवादी काँग्रेसच्या गटनेत्या खासदार सुप्रिया सुळे यांनी केली होती. त्याला उत्तर देताना खासदार सुनील तटकरे म्हणाले की, राष्ट्रवादी काँग्रेस पक्ष म्हणून आम्ही खासदार सुप्रिया सुळे, मोहम्मद फैजल आणि श्रीनिवास पाटील यांच्या विरोधात आम्ही पीटीशन दाखल केलं आहे. त्यांच्यावर कारवाई करण्याची मागणी केली आहे. खासदार अमोल कोल्हे यांनी आम्हाला समर्थन दिल्याचं प्रतिज्ञापत्र दिलं आहे. त्यामुळं कोल्हे हे आमच्या सोबत आहेत असं आम्ही मानतो.
राज्यातली जनता अजित पवारांसोबत
खासदार सुनील तटकरे म्हणाले की, 2 जुलैला आम्ही सत्तेत सहभागी होण्याचा निर्णय घेतला. नागालँड, झारखंड येथील आमदारांनी देखील आम्हाला समर्थन दिलं आहे. आम्ही लवकरच राज्यभर दौरा सुरू करत आहोत. राज्यातील जनता अजित पवार यानी घेतलेल्या निर्णयासोबत आहे, असं देखील तटकरे म्हणाले.
