“आपण दोघे राहू, तुझ्या बाबांना सोडून देते, आत्ता मंगळसूत्र काढून फेकते!” आईची अखेरची विनवणी; मुलाला वाचवताना आई-वडिलांचाही मृत्यू, हादरवून टाकणारं कारण आलं समोर

छत्रपती संभाजीनगर : खवड्या डोंगरावर घडलेल्या अत्यंत दुर्दैवी घटनेने छत्रपती संभाजीनगर परिसरात हळहळ व्यक्त होत आहे. तिसगाव परिसरातील खवड्या डोंगरावर एका तरुणाने टोकाचे पाऊल उचलल्यानंतर त्याला वाचवण्याच्या प्रयत्नात आई-वडिलांचाही जीव गेल्याची घटना समोर आली आहे. या घटनेमुळे एका कुटुंबावर क्षणात मोठे संकट कोसळले.

मिळालेल्या माहितीनुसार, अंबड तालुक्यातील धनगर पिंपळवाडी येथील चांदगुडे कुटुंब गेल्या काही वर्षांपासून शहरात राहत होते. त्यांचा मुलगा कुणाल हा अभ्यासात हुशार होता. त्याने दहावीच्या परीक्षेत 92 टक्के गुण मिळवले होते आणि पुढे डॉक्टर होण्याचे त्याचे स्वप्न होते. नुकताच त्याने अकरावीमध्ये प्रवेश घेतला होता.

मात्र काही दिवसांपासून कुणाल आणि त्याच्या वडिलांमध्ये काही कारणांवरून मतभेद सुरू होते. आर्थिक बाबी, मोबाईलच्या हप्त्यांसह इतर कौटुंबिक विषयांमुळे तो मानसिक तणावात असल्याचे सांगितले जात आहे. याच परिस्थितीत तो खवड्या डोंगरावर गेला. त्याची मानसिक अवस्था लक्षात आल्यानंतर आई-वडिलांनी त्याला समजावून सांगण्याचा प्रयत्न केला.

आईने मुलाला शांत करण्यासाठी भावनिक विनवणी केली आणि घरी परतण्याची विनंती केली. “तुझे पप्पांसोबत वाद आहेत ना, हे बघ, मी आत्ता मंगळसूत्र काढून फेकते. तुझ्या वडिलांना सोडून देते, तुझ्यासोबत येते. आपण दोघे राहू, पण मला सोडून जाऊ नकोस…” असे आईने सांगितले.

 

दरम्यान, चांदगुडे कुटुंबावर यापूर्वीही मोठा आघात झाला होता. सुमारे सहा वर्षांपूर्वी त्यांच्या मोठ्या मुलाचा मृत्यू झाला होता. या घटनेनंतर घरातील वातावरण तणावपूर्ण राहू लागल्याचे सांगितले जाते. वडील ट्रकचालक असल्याने कामानिमित्त त्यांना बराच काळ घरापासून दूर राहावे लागत होते. दरम्यान, तब्बल तीन महिन्यांनंतर वडील घरी परतले होते. त्यानंतर पुन्हा घरात वाद सुरू झाले आणि मागील दोन दिवसांपासून कुटुंबात सतत खटके उडत असल्याचे समोर आले आहे.

समोर आलेल्या माहितीनुसार, कुणालचे वडिलांसोबत काही दिवसांपासून मतभेद सुरू होते. खर्चासाठी घरी पैसे न पाठवणे आणि आयफोनच्या हप्त्यांचा आर्थिक ताण या गोष्टींमुळे तो अस्वस्थ झाल्याचे सांगितले जाते. याच तणावाच्या परिस्थितीत तो खवड्या डोंगरावर पोहोचला. डोंगराच्या कठड्याजवळ गेल्यानंतर त्याने आपला आयफोन, हातातील घड्याळ आणि गळ्यातील चांदीची साखळी काढून खाली फेकली. त्यानंतर परिस्थिती अधिक गंभीर बनली. त्याने आई-वडिलांचे म्हणणे ऐकले नाही आणि मुलाने टोकाचे पाऊल उचलल्यानंतर त्याला वाचवण्याच्या प्रयत्नात आई-वडीलही दरीत कोसळले. या दुर्घटनेत तिघांचाही दुर्दैवी मृत्यू झाला. घटनेची माहिती मिळताच संबंधित यंत्रणांनी घटनास्थळी धाव घेतली आणि पुढील कार्यवाही सुरू केली.