लातूर : दिल्लीतील आंदोलनाच्या यशानंतर कॉकरोच जनता पार्टीचे अध्यक्ष अभिजीत दिपके महाराष्ट्रातील विविध सरकारी शाळांमधील गैरसोयी समोर आणण्याचे काम सध्या करत आहेत. मात्र, 20 ऑगस्ट रोजी त्यांनी लातूर जिल्ह्यात घेतलेली भेट आता एका नव्या वादात सापडली आहे. औसा शहरातील जिल्हा परिषद शाळेत विनापरवानगी प्रवेश करून शासकीय कामात अडथळा आणल्याप्रकरणी अभिजीत दिपके यांच्यासह पक्षाचे स्थानिक कार्यकर्ते अजिंक्य शिंदे आणि इतर 4 ते 5 जणांविरोधात गुन्हा दाखल करण्यात आला आहे.
शाळेतील शिक्षिका सय्यद समशाद बानो खैरात अली (वय 53) यांनी औसा पोलीस ठाण्यात यासंदर्भात फिर्याद दिली आहे. त्यांच्या तक्रारीनुसार, 20 ऑगस्ट रोजी दुपारी 1:15 वाजण्याच्या सुमारास दिपके आणि त्यांच्या सहकाऱ्यांनी शाळेत प्रवेश केला. त्यांनी वर्गखोल्यांमध्ये जाऊन विद्यार्थ्यांना विविध प्रश्न विचारले, ज्यामुळे अध्यापनात आणि शासकीय कामात थेट व्यत्यय निर्माण झाला.
याशिवाय, शाळेची बदनामी करण्याच्या उद्देशाने इतर शाळेतील विद्यार्थ्यांना येथे बसवण्यात आल्याचा खोटा आरोप करण्यात आला. तसेच शिक्षकांना आक्षेपार्ह भाषा वापरून ‘तुम्हाला निलंबित करायला लावतो’ अशी धमकी दिल्याचा उल्लेखही तक्रारीत आहे. या संपूर्ण प्रकाराचे चित्रीकरण (व्हिडिओ) करून ते सोशल मीडियावर आणि माध्यमांमध्ये प्रसारित करण्यात आले.
या घटनेप्रकरणी औसा पोलिसांनी भारतीय न्याय संहितेच्या (BNS) कलम 132, 329(3), 351(2), 356(2) आणि 3(5) अंतर्गत गुन्हा नोंदवला आहे. सध्या या प्रकरणाचा पुढील तपास पोलीस करत आहेत.
दरम्यान, या दौऱ्यादरम्यान अभिजीत दिपके यांनी शाळेतील पिण्याचे पाणी, स्वच्छतागृहांची अवस्था आणि मूलभूत सुविधांच्या अभावावरून प्रशासनाला सवाल केले होते. तसेच त्यांनी मुख्याध्यापकांनाही याबाबत जाब विचारला होता. मात्र, पूर्वपरवानगी न घेता प्रवेश करणे आणि कामात अडथळा निर्माण करणे या आरोपांमुळे त्यांच्या अडचणी वाढल्या आहेत.
