शिरूर: चांगल्या पगाराची नोकरी मिळवून देण्याचे आमिष दाखवून २२ वर्षीय तरुणीला कारमधून शिरूर शहरातील एका लॉजमध्ये आणल्यानंतर त्या तरुणीवर अंमली पदार्थाचा वापर करून सामूहिक लैंगिक अत्याचार केल्याची धक्कादायक घटना समोर आली आहे.या प्रकरणी शिरूर पोलीस ठाण्यात सात जणांविरुद्ध गुन्हा दाखल करण्यात आला असून,एका संशयिताला पोलिसांनी अटक केली आहे.या घटनेमुळे शिरूर शहरात एकच खळबळ उडाली आहे.
याप्रकरणी पीडित २२ वर्षीय तरुणीने शिरूर पोलीस ठाण्यात फिर्याद दिली आहे.तिच्या फिर्यादीवरून दीपक श्रीमंदीलकर, अजय घेगडे,ऋषिकेश ढवळे, दीपक भोसले,सागर ढवळे, अनिकेत पठारे आणि एका अनोळखी व्यक्तीविरुद्ध शिरूर पोलीस ठाण्यात गुन्हा दाखल करण्यात आला आहे.
या प्रकरणी शिरूर पोलिसांनी दिलेल्या माहितीनुसार,१९ ऑगस्ट २०२६ च्या सायंकाळी पाच वाजल्यापासून २१ ऑगस्ट २०२६ पर्यंतच्या सायंकाळी साडेपाच वाजेपर्यंत हा प्रकार शिरूर येथील मार्वल इन लॉजमध्ये एका खोलीत घडल्याचा आरोप पीडित तरुणीने केला आहे.चांगल्या पगाराचे काम मिळवून देण्याचे आमिष दाखवून संबंधित आरोपींनी तरुणीला कारमधून लॉजमध्ये आणले. त्यानंतर तिला पांढऱ्या रंगाची नशा येणारी पावडर खायला दिल्याचे आणि तिच्या इच्छेविरुद्ध अत्याचार केल्याचे तरुणीने दिलेल्या फिर्यादीत नमूद करण्यात आले आहे.
तसेच,यादरम्यान अनिकेत पठारे याने तरुणीशी जबरदस्ती करण्याचा प्रयत्न करून तिच्या मनास लज्जा उत्पन्न होईल असे कृत्य करून शिवीगाळ व दमदाटी केल्याचा आरोपही फिर्यादीत तरुणीने केला आहे.
या प्रकरणी शिरूर पोलीस ठाण्यात संबंधित तरुणांवर विविध कलमांच्या अंतर्गत गुन्हा दाखल करण्यात आला असून,पोलिसांनी एका आरोपीला अटक केली आहे. घटनेचा पुढील तपास शिरूर पोलीस ठाण्याचे पोलीस निरीक्षक विनोद पाटील यांच्या मार्गदर्शनाखाली पोलीस उपनिरीक्षक हनमंत नकाते करीत आहेत.दरम्यान या प्रकरणातील आरोपींची शोध मोहीम कसून सुरू असून,पोलिस तपासात आणखी सत्यता उघड होणार आहे.
काल शुक्रवारी(ता.२१)सायंकाळी या तरूणीने पोलिस मदत नियंत्रण कक्षाच्या ११२ या क्रमांकावर संपर्क साधून आपल्यावरील अत्याचाराची माहिती देत मदतीची याचना केली.स्थानिक पोलिसांना याबाबत माहिती मिळताच,पोलिस निरीक्षक विनोद पाटील,पोलिस उपनिरीक्षक हणमंत नकाते, पोलिस उपनिरीक्षक शुभम चव्हाण यांनी संबंधित लॉजवर जावून तरूणीची सुटका केली.
