पुणे : बारामती तालुक्यातील तांदूळवाडी येथील दादा पाटीलनगर परिसरात एकाच घरात माय-लेकाचे मृतदेह आढळून आल्याने खळबळ उडाली आहे. १७ वर्षीय मुलाचा मृतदेह गळफास घेतलेल्या अवस्थेत, तर आईचा मृतदेह संशयास्पद परिस्थितीत आढळल्याने घटनेचे गूढ अधिकच वाढले आहे.
विवेक विजय गावडे (१७) आणि त्याची आई रमा विजय गावडे (४१) अशी मृतांची नावे आहेत. रमा यांच्या गळ्यावर काळसर व्रण आढळल्याचे सांगण्यात येत असून, त्यामुळे त्यांच्या मृत्यूबाबत संशय निर्माण झाला आहे. शुक्रवारी सकाळी सुमारे अकराच्या सुमारास ही घटना उघडकीस आली.
रमा यांचे पती विजय गावडे हे बारामती एमआयडीसीतील कंपनीत काम करतात. गुरुवारी रात्री ते कामासाठी घराबाहेर गेले होते. शुक्रवारी सकाळी घरी परतल्यानंतर घराचा दरवाजा बंद असल्याचे त्यांच्या लक्षात आले. पत्नी आणि मुलाला आवाज देऊनही प्रतिसाद न मिळाल्याने त्यांनी शेजाऱ्याच्या मदतीने दरवाजा उघडला. त्यावेळी घरातील दृश्य पाहून त्यांच्या पायाखालची जमीनच सरकली.
एकाच घरात आईचा संशयास्पद मृत्यू आणि मुलाचा गळफास घेतलेला मृतदेह आढळल्याने ही आत्महत्या आहे की त्यामागे अन्य काही कारण आहे, याचा तपास महत्त्वाचा ठरणार आहे. पोलिसांनी घटनास्थळी पाहणी करून तपास सुरू केला असून, शवविच्छेदनाच्या अहवालातून मृत्यूचे नेमके कारण स्पष्ट होण्याची शक्यता आहे.
