छत्रपती संभाजीनगर: छत्रपती संभाजीनगरात एका २५ वर्षीय फिजिओथेरपिस्ट तरुणीचे क्लिनिकमध्ये कपडे बदलतानाचे फोटो आणि व्हिडिओ गुपचूप काढून, ते सोशल मीडियावर व्हायरल करण्याची धमकी देत तिच्यावर अत्याचार केल्याचा गंभीर प्रकार समोर आला आहे. या प्रकरणी तरुणीच्या तक्रारीवरून क्रांतीचौक पोलीस ठाण्यात तीन जणांविरोधात गुन्हा दाखल करण्यात आला असून, मुख्य संशयित सरफराज मेहबुब गोनगावे याला पोलिसांनी अटक केली आहे.
पोलिसांनी दिलेल्या माहितीनुसार, पीडित तरुणी एका शिक्षण संस्थेत फिजिओथेरपिस्ट म्हणून काम करते. तसेच शहरातील एका हेअर ट्रान्सप्लांट सेंटरमध्ये ती ट्रॅकोलॉजिस्ट म्हणूनही कार्यरत आहे. आरोपी सरफराज हा टेक्निशियन असून, दोघेही शालेय जीवनापासून एकमेकांना ओळखत असल्याचे तक्रारीत नमूद करण्यात आले आहे.
१ एप्रिल २०२६ रोजी सकाळी क्लिनिकमध्ये तरुणी कपडे बदलत असताना सरफराजने तिच्या नकळत मोबाईलमध्ये फोटो आणि व्हिडिओ काढल्याचा आरोप आहे. त्यानंतर हे फोटो आणि व्हिडिओ दाखवून त्याने तरुणीकडे संबंध ठेवण्याची मागणी केली. तिने नकार दिल्यानंतर हे चित्रीकरण सोशल मीडियावर प्रसारित करून बदनामी करण्याची धमकी दिल्याचे तक्रारीत म्हटले आहे.
एप्रिलच्या अखेरीस आरोपीने क्लिनिकमधील ऑपरेशन थिएटरमध्ये तरुणीवर अत्याचार केल्याचा आरोप असून, त्यावेळीही त्याने मोबाईलमध्ये चित्रीकरण केल्याचे तक्रारीत नमूद आहे.
१५ जुलै रोजी तरुणीने क्लिनिकमध्ये सरफराजला त्याच्या वर्तनाबाबत जाब विचारला. त्यावेळी त्याने तिचा मोबाईल हिसकावून घेतला. त्यानंतर त्याचा भाऊ अरबाज आणि वडील मेहबुब हे तेथे आले. तक्रार केल्यास फोटो आणि व्हिडिओ सोशल मीडियावर व्हायरल करण्याची धमकी देत त्यांनी शिवीगाळ आणि मारहाण केल्याचा आरोप तरुणीने केला आहे.
तसेच “मी सांगेल तसेच वागायचे, अन्यथा दुसऱ्या क्लिनिकमधील नोकरी सोडायची; नाहीतर व्हिडिओ व्हायरल करीन,” अशी धमकी दिल्याचेही तक्रारीत नमूद आहे.
या प्रकारानंतर तरुणीने क्रांतीचौक पोलीस ठाण्यात तक्रार दाखल केली. त्यानुसार सरफराज, अरबाज आणि मेहबुब गोनगावे यांच्याविरोधात गुन्हा नोंदवण्यात आला आहे. गुन्हा दाखल होताच पोलिसांनी सरफराजला अटक केली असून, प्रकरणाचा पुढील तपास सुरू आहे.
