डॉ. अशोक बालगुडे
पुणे : वाढती प्रवासी संख्या आणि गर्दीने त्रस्त झालेल्या पुणे विमानतळावरील जुन्या टर्मिनलचे नूतनीकरण अखेर पूर्ण झाले आहे. मात्र, नवे रूप धारण केलेले हे टर्मिनल प्रवाशांच्या सेवेत दाखल होण्यासाठी अद्याप केंद्रीय नागरी विमान वाहतूक सुरक्षा ब्युरोच्या (बीसीएएस) अंतिम परवानगीची प्रतीक्षा आहे. त्यामुळे सुविधांची तयारी पूर्ण झाली असली, तरी प्रवाशांना प्रत्यक्ष दिलासा मिळण्यासाठी आणखी एक प्रशासकीय पायरी बाकी आहे.
सुमारे ४,०७५ चौरस मीटर क्षेत्रात विकसित करण्यात आलेल्या या टर्मिनलमध्ये तपासणी कक्ष, सुरक्षा तपासणी आणि प्रवासी प्रतीक्षाक्षेत्राचा विस्तार करण्यात आला आहे. चौदा चेक-इन काउंटर आणि ६-अ व ६-ब हे दोन नवे बोर्डिंग गेट तयार करण्यात आले आहेत. या विस्तारामुळे विमानतळाची प्रवासी हाताळणी क्षमता ताशी सुमारे ४०५ प्रवाशांनी वाढणार असून, गर्दीच्या वेळेत होणारी कोंडी कमी होण्याची अपेक्षा आहे.
प्रवाशांच्या सोयीसाठी किरकोळ विक्री केंद्रे, खाद्यपदार्थांची दुकाने, लहान मुलांसाठी स्वतंत्र बेबी केअर रूम, डायपर बदलण्याची सुविधा, वीज जोडणी असलेल्या आसनांची वाढ आणि बोर्डिंग गेटवर डिजी यात्रा सुविधा उपलब्ध करून देण्यात आली आहे. अग्निसुरक्षा प्रमाणपत्र, कार्यान्वयनपूर्व चाचणी आणि अंतिम सुरक्षा तपासणीची प्रक्रिया पूर्ण झाली आहे.
विमानतळावरील वाढता प्रवासी भार पाहता उपलब्ध पायाभूत सुविधांचा अधिक परिणामकारक वापर करणे ही काळाची गरज आहे. जुने टर्मिनल आधुनिक करून क्षमता वाढविण्याचा निर्णय त्यादृष्टीने महत्त्वाचा आहे. मात्र, पुणे विमानतळाच्या वाढत्या गरजा पाहता तात्पुरत्या विस्तारांपलीकडे दीर्घकालीन नियोजनाची गरज कायम आहे.
केंद्रीय नागरी विमान वाहतूक राज्यमंत्री मुरलीधर मोहोळ यांनी जुन्या टर्मिनलच्या विस्तारित भागाची पाहणी केली. वाढत्या प्रवासी संख्येमुळे गर्दी कमी करून प्रवाशांना अधिक चांगल्या सुविधा देण्यास प्राधान्य असल्याचे त्यांनी सांगितले. आता बीसीएएसची अंतिम परवानगी मिळाल्यानंतर हे टर्मिनल प्रवाशांसाठी खुले होणार आहे.
