बीड : गेल्या काही दिवसांपासून गुन्हेगारीच्या घटनांमध्ये वाढ होताना दिसत आहे. किरकोळ कारणांवरून खून, खुनाचा प्रयत्न, आत्महत्या यांसारखे गुन्हे घडत आहेत. त्यातच एक पतीने पत्नीचा खून केला नंतर स्वत:ही गळफास घेऊन जीवन संपवलं. अगोदर उशीने तोंड दाबून पत्नीचा खून करण्यात आला, नंतर स्वतः देखील दोरीने गळफास घेऊन पतीने आत्महत्या केली. ही घटना बीड शहरातील वृंदावन कॉलनीत घडली. कौटुंबिक वादातून हा प्रकार घडल्याचा अंदाज असून पोलिस तपास करत आहेत.
राधा वायभट (वय 26) व भागवत वायभट (वय 35, दोघेही रा. लिंबागणेश ता.बीड ह.मु. बीड) अशी मृतांची नावे आहेत. भागवत हा रिक्षा चालक असून, बीडमध्ये भाड्याने घर करून कुटुंबासह रहात होता. तो रात्री घरी आला. यावेळी पत्नी आणि त्यांच्यात किरकोळ कारणावरून वाद झाले. यामध्ये त्याने पत्नीला मारहाणही केली. त्यानंतर मध्यरात्रीच डोक्या खाली घेण्याच्या उशीने पत्नीचे तोंड दाबले. यामध्ये गुदमरून पत्नी राधाचा मृत्यू झाला. त्यानंतर स्वतः देखील दरवाजा बाहेर असलेल्या हुकाला दोरीने गळफास घेतला.
दरम्यान, सकाळी झोपेतून उठवल्यावर त्यांच्या पाच वर्षांच्या चिमुकलीने हा प्रकार पाहिला. तिने रडायला सुरूवात केली. त्यामुळे खालच्या मजल्यावरील लोक वरच्या मजल्यावर गेले. त्यांनी हा सर्व प्रकार पाहिल्यावर शिवाजीनगर पोलिसांना कळवले. पोलिसांनी धाव घेत पंचनामा करून दोन्ही मृतदेह जिल्हा रूग्णालयात शवविच्छेदन करण्यासाठी नेले होते. हा वाद कौटुंबिक कारणावरून झाल्याचे समजत आहे.
