बीड : बीडमधून मोठ्या भीषण अपघाताची बातमी समोर येत आहे. अंबाजोगाई-लातूर रोडवर भीषण अपघात झाला असून यामध्ये चार जणांचा जागीच मृत्यू झाला आहे. मुसळधार पावसात अंदाज न आल्याने कार-आणि कंटेनरची धडक झाली. हा अपघात इतका भीषण होता की, कारचा अक्षरशः चुराडा झाला असून कारमधील सर्व व्यक्तींचा मृत्यू झाला आहे.
मिळालेल्या माहितीनुसार, बीडच्या अंबाजोगाई-लातूर रोडवर नांदगाव पाटीजवळ आज पहाटे स्विफ्ट कार आणि कंटेनरचा भीषण अपघात झाला. या अपघातात स्विफ्ट कारमधील चौघेही जागीच ठार झाले आहेत. सर्व मृत व्यक्ती लातूर जिल्ह्यातील चाकूर तालुक्यातील जगलपूर येथील आहेत. त्यांची नावे अद्याप समजू शकलेली नाहीत.
रात्री उशीरा जगलपूर येथील चार जण स्विफ्ट कारमधून (एमएच 24 एएस 6334) औरंगाबादला निघाले होते. रात्री सुरू असलेल्या मुसळधार पावसात अंबाजोगाई लातूर रोडवरील पाचपीर दर्गा जवळ त्यांच्या कारची आणि समोरून येणाऱ्या कंटेनरची (एमएच 12 एमव्ही 7188) जोरदार धडक झाली.
हा अपघात मध्यरात्री एक वाजताच्या सुमारास झाला असून यावेळी कार कंटेनरच्या खाली घुसल्याने कारचा चुराडा झाला आहे. यामध्ये कारमधील चौघांचा जागीच मृत्यू झाला. सर्व मृतदेह अंबाजोगाईच्या शासकीय रुग्णालयात हलविण्यात आले आहेत.
