मुंबई: राज्यात आगामी स्थानिक स्वराज्य संस्थांच्या निवडणुकांचा बिगुल वाजताच भारतीय जनता पक्षाने (भाजप) तयारीला सुरुवात केली आहे. विशेषतः मराठवाडा विभागात जोरदार कामाला लागण्याचे आदेश खुद्द उपमुख्यमंत्री देवेंद्र फडणवीस यांनी आमदारांना दिले आहेत.
राज्यात सर्वोच्च न्यायालयाच्या आदेशानंतर स्थानिक स्वराज्य संस्थांच्या निवडणुका जाहीर होण्याची प्रक्रिया गतिमान झाली आहे. राज्य निवडणूक आयोगाने तयारी सुरू केली असून, त्या अनुषंगाने भाजपनेदेखील प्रत्येक विभागासाठी स्वतंत्र गेमप्लॅन ठरवायला सुरुवात केली आहे.
फडणवीसांचा कानमंत्र
सोमवारी रात्री मुख्यमंत्री निवास ‘वर्षा’ येथे फडणवीसांनी मराठवाड्यातील भाजप आमदारांची बैठक घेतली. या बैठकीत त्यांनी स्पष्ट शब्दांत आदेश दिले “या निवडणुकीत भाजप पहिल्या क्रमांकावर असलाच पाहिजे. प्रत्येक मतदारसंघात सर्व ताकद लावून द्या.”
मंगळवारी झालेल्या आढावा बैठकीत फडणवीसांनी आमदारांशी थेट संवाद साधला. “तुमच्या मतदारसंघातील पाच महत्त्वाची कामं सांगा, त्यावर तत्काळ निर्णय घेतला जाईल,” असे आश्वासन त्यांनी दिले. स्थानिक समित्यांच्या वाटपाचा अधिकारही संबंधित आमदारांना देण्यात येईल, असेही त्यांनी जाहीर केले.
महापालिकांमध्ये भगवा फडकवण्याचा निर्धार
फडणवीस म्हणाले, “महापालिका निवडणुकीत भाजपचा झेंडा फडकवण्यासाठी आवश्यक ती सर्व ताकद पुरवली जाईल.” त्यांनी स्पष्ट केलं की, कोणताही निर्णय संबंधित आमदारांना विश्वासात घेतल्याशिवाय होणार नाही.
भाजपकडून निवडणुकीसाठीची व्यूहणीती वेगाने ठरवली जात असून, युतीसंबंधी चर्चा आणि जागावाटपासंबंधी निर्णय लवकरच घेतले जाण्याची शक्यता आहे.
