Crime News: छत्रपती संभाजीनगर : प्रेमसंबंधात विश्वास महत्त्वाचा असतो. मात्र त्याच प्रेमात संशय आणि राग वाढला, तर त्याचे परिणाम गंभीर होऊ शकतात. अशाच एका प्रकरणात संशयातून तरुणाने आपल्या प्रेयसीचा गळा आवळून खून (Murder) केल्याची धक्कादायक घटना छत्रपती संभाजीनगर शहरात घडली होती. या घटनेमुळे परिसरात मोठी खळबळ उडाली होती.
मूळचा उत्तर प्रदेशचा रहिवासी असलेला भोलाकुमार सध्या मुकुंदवाडी परिसरात वास्तव्यास होता. त्याचे एका तरुणीसोबत प्रेमसंबंध होते. मात्र, तिचे दुसऱ्या कोणाशी तरी संबंध असल्याचा संशय त्याच्या मनात घर करून होता. याच संशयातून त्यांच्यात वारंवार वाद होत होते. रागाच्या भरात त्याने प्रेयसीचा काटा काढण्याचे ठरवले आणि तिची हत्या केली. या प्रकरणाचा निकाल देताना न्यायालयाने आरोपीला जन्मठेपेची शिक्षा सुनावली आहे.
या प्रकरणात राहुल बरखू राय यांनी दिलेल्या फिर्यादीनुसार, राहुल हे आपल्या कुटुंबासह मुकुंदवाडी येथे राहत होते. आरोपी भोलाकुमार देखील त्यांच्यासोबत राहत होता. भोलाचे संबंधित तरुणीशी प्रेमसंबंध होते. मात्र त्या महिलेसोबत दुसऱ्या व्यक्तीचे संबंध असल्याचा त्याला संशय होता. याच कारणावरून दोघांमध्ये वारंवार वाद होत होते. एका वादानंतर भोलाने तरुणीचा मोबाईल जाळून टाकला होता. ही बाब समजताच राहुलचा भाऊ सुनील याने भोलाला घर सोडण्यास सांगितले. त्यानंतर भोला स्वराजनगर येथे राहायला गेला.
प्रेयसीने आपल्याला दूर केल्याचा राग भोलाच्या मनात होता. 8 नोव्हेंबर रोजी सायंकाळी त्याने प्रेयसीसोबत वाद घालून तिला मारहाण केली. त्यानंतर ओढणीने गळा आवळून तिचा खून केला. खून केल्यानंतर मृतदेह गुंडाळून जवळच्या मैदानात टाकून दिला. विशेष म्हणजे, तरुणी घरी न परतल्याने भोला स्वतः राहुलसोबत तिचा शोध घेत होता. दुसऱ्या दिवशी पहाटे दूध घेऊन जाणाऱ्या एका महिलेला मैदानात मृतदेह आढळून आला. त्यानंतर मुकुंदवाडी पोलिस ठाण्यात खुनाचा गुन्हा दाखल करण्यात आला.
खटल्यादरम्यान सहायक सरकारी वकील अरविंद बागूल यांनी 11 साक्षीदार तपासले. यातील 3 साक्षीदार महत्त्वाचे ठरले. सर्व पुरावे आणि साक्षी तपासल्यानंतर न्यायालयाने भादंवि कलम 302 अंतर्गत आरोपीला जन्मठेप आणि 10 हजार रुपये दंडाची शिक्षा सुनावली. दंड न भरल्यास आरोपीला अतिरिक्त 3 महिन्यांची सक्त मजुरी भोगावी लागणार आहे.
