Crime News: धाराशिव : धाराशिव जिल्ह्यात गुरुवारी जिल्हा परिषद निवडणुकीच्या प्रचाराचा शेवट झाला. प्रचाराच्या अखेरच्या दिवशीच कळंब तालुक्यातील देवळाली गावात घडलेल्या एका दुर्दैवी घटनेमुळे राजकीय वातावरणात खळबळ उडाली आहे. शिवसेना (उद्धव बाळासाहेब ठाकरे) पक्षाच्या उमेदवार मनीषा वाघमारे या प्रचारादरम्यान गंभीर जखमी झाल्या. सांगता रॅलीदरम्यान त्यांच्या अंगावर गरम तेल सांडल्याने त्या भाजल्या गेल्या असून सध्या त्यांच्यावर रुग्णालयात उपचार सुरू आहेत.
मिळालेल्या माहितीनुसार, खामसवाडी जिल्हा परिषद गटातून मनीषा वाघमारे या निवडणूक लढवत आहेत. प्रचाराच्या शेवटच्या दिवशी देवळाली गावात त्यांच्या प्रचाराची सांगता रॅली आयोजित करण्यात आली होती. या रॅलीला कार्यकर्त्यांची मोठी गर्दी होती. अनेक कार्यकर्ते हातात पेटत्या मशाली घेऊन सहभागी झाले होते. वातावरण उत्साहाचे होते आणि रॅली गावातून पुढे जात होती.
दरम्यान, रॅली सुरू असताना अचानक मनीषा वाघमारे यांचा पाय अडखळला आणि त्यांचा तोल गेला. त्या खाली पडताच त्यांच्या हातातील पेटत्या मशालीतील गरम तेल थेट त्यांच्या अंगावर सांडले. या घटनेत त्यांचे हात आणि पाय भाजले गेले. काही क्षणातच रॅलीतील आनंदाचे वातावरण भीती आणि गोंधळात बदलले.
घटना लक्षात येताच उपस्थित कार्यकर्त्यांनी तातडीने रॅली थांबवली. मनीषा वाघमारे यांना प्राथमिक मदत देत लगेच धाराशिव येथील नोबेल हॉस्पिटलमध्ये दाखल करण्यात आले. डॉक्टरांनी तपासणी केल्यानंतर उपचार सुरू केले. सध्या त्यांची प्रकृती स्थिर असल्याची माहिती मिळत आहे, मात्र भाजल्याच्या जखमा गंभीर असल्याने त्यांच्यावर विशेष देखरेखीखाली उपचार सुरू आहेत.
या घटनेमुळे प्रचाराच्या शेवटच्या दिवशीच कळंब तालुक्यात मोठी चर्चा रंगली आहे. निवडणुकीच्या धामधुमीत अशा घटना टाळण्यासाठी पुढील काळात अधिक काळजी घेण्याची गरज असल्याची प्रतिक्रिया अनेक नागरिकांकडून व्यक्त होत आहे.
