दौंड, ता. 22 : शेताचा बांध कोरल्याच्या कारणावरून झालेल्या हाणामारीत बाप-लेकावर कोयता अन् सत्तूरने हल्ला करून तुमची ‘राजेगावसारखी अवस्था करू’ अशी धमकी दिल्याची घटना घडली आहे. वाटलुज (ता. दौंड) ग्रामपंचायत हद्दीत सोमवारी (ता. 22) दुपारी साडेबारा वाजण्याच्या सुमारास हि घटना घडली. याप्रकरणी तिघांवर दौंड पोलीस ठाण्यात गुन्हा दाखल करण्यात आला. याप्रकरणी 59 वर्षीय शेतकऱ्याने दौंड पोलीस ठाण्यात फिर्याद दिली आहे.
देविदास हिराजी शेंडगे, (वय-59, व्यवसाय-शेती. रा. वाटलुज, ता. दौंड) असे मारहाण झालेल्या शेतकऱ्याचे नाव आहे. तर वैभव दादासो शेंडगे, सतिष भाऊसो शेंडगे, व दादासो भाऊसो शेंडगे (सर्व रा. वाटलुज, ता. दौंड) असे मारहाण करून धमकी देणाऱ्या तिघांची नावे आहेत. याप्रकरणी देविदास शेंडगे यांनी फिर्याद दिली आहे.
पोलिसांनी दिलेल्या माहितीनुसार, फिर्यादी देविदास शेंडगे सोमवारी दुपारी आपल्या शेतात काम करत होते. यावेळी आरोपी वैभव शेंडगे आणि सतिष शेंडगे तिथे आले. “तू माझ्या शेताचा बांध का कोरला?” असा जाब विचारत त्यांनी शिवीगाळ सुरू केली. “तुझी राजेगावसारखी अवस्था करून तुला जिवंत मारतो,” अशी धमकी देऊन ते तिथून निघून गेले.
या घटनेनंतर देविदास शेंडगे हे आपल्या भावासोबत मोटारसायकलवरून गावात जात असताना, आरोपींनी त्यांचा रस्ता अडवला. यावेळी वैभव शेंडगे याने हातात असलेल्या कोयत्याने देविदास यांच्या डोक्यात वार केला. त्याचवेळी सतिष शेंडगे याने सत्तूर उगारून दहशत निर्माण केली, ज्यामुळे देविदास यांचा भाऊ जीव वाचवण्यासाठी तिथून पळून गेला.
वडिलांचा आरडाओरडा ऐकून त्यांचा मुलगा विजय शेंडगे मदतीला धावून आला. मात्र, आरोपी सतिष शेंडगे याने त्याच्या हातातील सत्तूर विजयच्या डोक्यात मारून त्यालाही गंभीर जखमी केले. आरोपी दादासो शेंडगे याने काठीने मारहाण केली. डोक्यातून रक्तस्राव होत असतानाही आरोपींनी त्यांना लाथाबुक्क्यांनी मारहाण सुरूच ठेवली.
दरम्यान, रस्त्यावरील नागरिक जमा झाल्याचे पाहून आरोपींनी तिथून पळ काढला. याप्रकरणी तिघांवर दौंड पोलीस ठाण्यात गुन्हा दाखल करण्यात आला असून पुढील तपास अंमलदार सागर म्हेत्रे करत आहेत.
