पुणे: पुणे जिल्ह्यातील कामशेत परिसरात पोलिसांनी मोठी कारवाई करत संभाव्य दरोड्याचा कट उधळून लावला आहे. रात्रगस्तीवर असलेल्या पोलिसांनी संशयास्पद हालचाली करणाऱ्या दोघांना पाठलाग करून पकडले. त्यांच्या ताब्यातून शस्त्रे, महागडे मोबाईल, डिजिटल घड्याळे आणि वाहनांसह एकूण 11 लाख 55 हजार रुपयांचा मुद्देमाल जप्त करण्यात आला आहे. (Pune Crime)
पोलिसांनी दिलेल्या माहितीनुसार, 5 जून रोजी पहाटे कामशेत पोलीस ठाण्याचे कर्मचारी गस्त घालत असताना सहारा कॉलनीजवळील मोकळ्या जागेत दोन व्यक्ती संशयास्पदरीत्या फिरताना दिसल्या. पोलिसांचे वाहन पाहताच त्यांनी दुचाकीवरून पळण्याचा प्रयत्न केला. मात्र, पोलिसांनी तत्काळ पाठलाग करून त्यांना ताब्यात घेतले.
अटक करण्यात आलेल्यांची नावे एकनाथ कृष्णा रोकडे (वय 28) आणि संकेत बाबू माने (वय 32, दोघेही रा. मानखुर्द, मुंबई) अशी आहेत. तपासादरम्यान त्यांच्या दुचाकीच्या नंबर प्लेटवर ओळख लपवण्यासाठी कापड बांधलेले आढळले.
आरोपींची झडती घेतली असता विनापरवाना धारदार कोयता, चाकू, कटर, लोखंडी रॉड, दोरखंड, मिरचीपूड तसेच अनेक महागडे मोबाईल फोन आणि डिजिटल घड्याळे आढळून आली. या सर्व वस्तू जप्त करण्यात आल्या आहेत.
पोलीस कॉन्स्टेबल रवींद्र राऊळ यांच्या फिर्यादीवरून कामशेत पोलीस ठाण्यात गुन्हा दाखल करण्यात आला आहे. प्राथमिक चौकशीत आरोपी आणखी तीन साथीदारांसह परिसरात मोठा दरोडा टाकण्याच्या तयारीत असल्याचा संशय व्यक्त करण्यात आला आहे.
या प्रकरणाचा तपास सुरू असून फरार साथीदारांचा शोध घेतला जात आहे. तसेच या आरोपींचा यापूर्वीच्या गुन्ह्यांशी काही संबंध आहे का, याचाही तपास पोलीस करत आहेत. पोलिसांच्या या कारवाईमुळे संभाव्य मोठा गुन्हा टळल्याचे मानले जात आहे.
