पुणे: अन्न व औषध प्रशासनाने (एफडीए) पुण्यात भेसळीचा संशय असलेल्या दुग्धजन्य पदार्थांवर मोठी कारवाई करत 47 लाख 36 हजार रुपये किमतीचा साठा जप्त केला आहे. ‘सेफ फूड, सेफ ड्रग, सेफ महाराष्ट्र’ मोहिमेअंतर्गत सोमवार पेठ, बुधवार पेठ, शुक्रवार पेठ, कोथरूड आणि हडपसर परिसरातील 17 ठिकाणी धाडी टाकण्यात आल्या.
या कारवाईत खवा, पनीर, चीजसदृश पदार्थ आणि तूप यांचे एकूण 35 नमुने तपासणीसाठी घेण्यात आले. जप्त करण्यात आलेल्या साठ्यात 2,806 किलो पनीर, 13,127 किलो खवा, 138 किलो चीज ॲनालॉग आणि 960 किलो तुपाचा समावेश आहे. या सर्व नमुन्यांची प्रयोगशाळेत तपासणी केली जाणार असून अहवालानंतर पुढील कारवाई होणार आहे.
याचवेळी सातारा जिल्ह्यातील माण, जावळी आणि कराड तालुक्यांमध्येही तूप, फरसाण आणि शेव विक्रेत्यांवर कारवाई करण्यात आली. तेथून 4 नमुने तपासणीसाठी घेण्यात आले असून सुमारे 2 लाख 38 हजार रुपये किमतीचा साठा जप्त करण्यात आला आहे.
दरम्यान, राज्यभरात प्रतिबंधित गुटखा, पानमसाला आणि तत्सम पदार्थांविरोधात एफडीएने 1 ते 5 जून या कालावधीत विशेष मोहीम राबवली. या काळात 195 ठिकाणी छापे टाकण्यात आले असून 1 कोटी 99 लाख 18 हजार 475 रुपये किमतीचा प्रतिबंधित साठा जप्त करण्यात आला आहे. तसेच 192 जणांना अटक करण्यात आली आहे.
5 जून रोजी धाराशिव जिल्ह्यातील परांडा येथे 1 कोटी 2 लाख 67 हजार 263 रुपये किमतीचा प्रतिबंधित माल जप्त करण्यात आला असून 2 जणांना अटक करण्यात आली. तर 4 जून रोजी समृद्धी महामार्गावरील सावंगी टोल नाका येथे 60 लाख 50 हजार रुपये किमतीचा माल आणि वाहने जप्त करण्यात आली. 3 जून रोजी धुळे येथे झालेल्या कारवाईत 23 लाख 50 हजार रुपये किमतीचा प्रतिबंधित साठा ताब्यात घेण्यात आला.
पिंपरी-चिंचवडमध्ये झालेल्या कारवाईत 6 जणांविरोधात गुन्हे दाखल करण्यात आले असून विविध कायद्यांअंतर्गत राज्यभरात एकूण 192 जणांना अटक करण्यात आल्याची माहिती प्रशासनाने दिली.
