पुणे: सोशल मीडियावर झालेली ओळख, प्रेमाचे आश्वासन आणि लग्नाचे आमिष यांचा वापर करून पुण्यातील एका व्यक्तीची तब्बल 16 लाख 50 हजार रुपयांची फसवणूक झाल्याचा प्रकार उघडकीस आला आहे. या प्रकरणी सिंहगड रस्ता पोलीस ठाण्यात एका महिलेसह तिच्या साथीदारांविरोधात गुन्हा दाखल करण्यात आला असून पोलीस पुढील तपास करत आहेत. (Pune Crime)
पोलिसांनी दिलेल्या माहितीनुसार, वडगाव बुद्रुक परिसरात राहणाऱ्या 41 वर्षीय व्यक्तीने याबाबत तक्रार दाखल केली आहे. जून ते सप्टेंबर 2025 या कालावधीत हा संपूर्ण प्रकार ऑनलाईन माध्यमातून घडल्याचे समोर आले आहे.
तक्रारीनुसार, संबंधित महिलेने सोशल मीडियाच्या माध्यमातून तक्रारदाराशी संपर्क साधला. ओळख वाढल्यानंतर तिने प्रेम व्यक्त करत लग्नाचे आश्वासन दिले. हळूहळू विश्वास संपादन केल्यानंतर परकीय चलनांच्या खरेदी-विक्रीत गुंतवणूक केल्यास मोठा नफा मिळवून देण्याचे आमिष दाखवले.
महिलेच्या बोलण्यावर विश्वास ठेवून तक्रारदाराने वेळोवेळी विविध खात्यांमध्ये पैसे जमा केले. सुरुवातीला गुंतवणुकीवर नफा मिळत असल्याचा आभास निर्माण करण्यात आला. त्यामुळे तक्रारदाराचा विश्वास आणखी वाढला आणि त्याने अधिक रक्कम गुंतवली. अशाप्रकारे आरोपींनी त्याच्याकडून एकूण 16 लाख 50 हजार रुपये उकळल्याचा आरोप आहे.
मात्र, गुंतवलेली रक्कम आणि नफा परत मागितल्यानंतर आरोपींकडून टाळाटाळ सुरू झाली. त्यानंतर संपर्कही कमी झाल्याने आपली फसवणूक झाल्याची जाणीव तक्रारदाराला झाली. अखेर त्याने पोलिसांकडे धाव घेत तक्रार नोंदवली.
या प्रकरणी पोलिसांनी फसवणुकीचा गुन्हा दाखल केला असून आरोपींनी वापरलेल्या बँक खात्यांची, ऑनलाईन व्यवहारांची आणि इतर डिजिटल पुराव्यांची तपासणी सुरू केली आहे. सोशल मीडियावरील ओळखी, प्रेमसंबंधांचे आमिष आणि झटपट नफ्याच्या आश्वासनांवर विश्वास ठेवून आर्थिक व्यवहार करू नयेत, असे आवाहन पोलिसांनी नागरिकांना केले आहे.
