पुणे : पुणे शिक्षक मतदारसंघातील चुरशीनंतर आता पुणे विभाग पदवीधर मतदारसंघ निवडणुकीच्या राजकारणातही मोठी खळबळ उडाली आहे. महायुतीमध्ये सुरू असलेल्या अंतर्गत गटबाजीतून भाजपच्या अडचणी वाढण्याची चिन्हे आहेत. शिक्षक मतदारसंघात मित्रपक्षांमध्ये झालेल्या चुरशीची पुनरावृत्ती आता पदवीधर मतदारसंघात पाहायला मिळण्याची शक्यता वर्तवली जात आहे.
या निवडणुकीत अपक्ष उमेदवार म्हणून रिंगणात उतरलेले भाऊसाहेब आंधळकर यांनी मोठा दावा केला आहे. मंत्री उदय सामंत यांनी अलीकडेच आंधळकर यांच्या निवासस्थानी जाऊन भेट घेतली. या भेटीनंतर, आपल्याला शिवसेना (शिंदे गट) पक्षाचा थेट पाठिंबा असल्याचे अंधाळकरांनी जाहीर केले आहे. या दाव्यामुळे राजकीय वर्तुळात जोरदार चर्चा सुरू झाली असून, भाजपच्या गोटात अस्वस्थता पसरली आहे. शिक्षक मतदारसंघात शिंदे सेनेने भाजपविरुद्ध वेगळी भूमिका घेतली होती, तीच रणनीती आता पदवीधर मतदारसंघातही कायम राहिल्यास महायुतीसमोरील अडचणी वाढू शकतात.
या मतदारसंघातून स्मिता जाधव यांना महायुतीची अधिकृत उमेदवारी मिळाली आहे, तर महाविकास आघाडीकडून हर्षदा देशमुख-जाधव रिंगणात आहेत. पुणे, सातारा, सांगली, कोल्हापूर आणि सोलापूर या 5 जिल्ह्यांमध्ये पसरलेल्या या मतदारसंघात सध्या प्रचाराचा धुरळा उडाला आहे. दुसरीकडे, एमपीएससी विद्यार्थ्यांच्या आंदोलनावरून महाविकास आघाडीने आक्रमक भूमिका घेत पुण्यातील राजकीय वातावरण तापवले आहे. त्यामुळे पश्चिम महाराष्ट्रात महायुती विरुद्ध मविआ असा थेट सामना रंगला आहे.
उमेदवार भाजपचा असला तरी मित्रपक्षांकडून उमटणारे विसंगत सुर महायुतीसाठी डोकेदुखी ठरत आहेत. मंत्री उदय सामंत आणि अंधाळकर यांच्या भेटीमागील राजकीय समिकरणांची अधिकृत घोषणा अद्याप झाली नसली, तरी या ताज्या घडामोडींमुळे भाजपचे टेन्शन चांगलेच वाढले आहे.
