लोणी काळभोर, ता. 23 : किशोरवयीन मुलींना शारीरिक व भावनिक बदलांची योग्य माहिती मिळावी, आरोग्याबाबत जागरूकता वाढावी आणि स्वतःच्या सुरक्षिततेचे भान निर्माण व्हावे, या उद्देशाने लोणी काळभोर येथील कन्या प्रशालेत विद्यार्थिनींसाठी आरोग्य जनजागृती सत्राचे आयोजन करण्यात आले. साधू वासवानी कॉलेज ऑफ नर्सिंग, पुणे यांच्या सामुदायिक आरोग्य परिचर्या विभागाच्या वतीने गुरुवारी (ता. 22) हा उपक्रम राबविण्यात आला.
पुण्यातील साधू वासवानी कॉलेज ऑफ नर्सिंगच्या बी.एस्सी. नर्सिंग तृतीय वर्षातील विद्यार्थिनींनी सामुदायिक आरोग्य परिचर्या विभागातील क्लिनिकल पोस्टिंगदरम्यान या सत्राचे आयोजन केले. यावेळी विद्यार्थिनींना किशोरावस्थेतील आरोग्यविषयक महत्त्वाच्या बाबी सोप्या भाषेत समजावून सांगण्यात आल्या. या सत्रात मासिक पाळीदरम्यान घ्यावयाची काळजी, वैयक्तिक स्वच्छता, किशोरावस्थेतील शारीरिक व भावनिक बदल, महिलांची सुरक्षितता आणि मोबाईलच्या अतिवापराचे दुष्परिणाम या विषयांवर मार्गदर्शन करण्यात आले. तसेच किशोरवयीन मुलींच्या आरोग्य व कल्याणासाठी शासनाकडून राबविण्यात येणाऱ्या विविध योजनांची माहितीही देण्यात आली.
किशोरावस्थेत होणारे बदल समजून घेणे, मासिक पाळीविषयी असलेले गैरसमज दूर करणे, स्वच्छतेच्या योग्य सवयी अंगीकारणे आणि स्वतःच्या सुरक्षिततेबाबत सजग राहणे, यावर विशेष भर देण्यात आला. मोबाईलचा वापर आवश्यकतेनुसार आणि योग्य पद्धतीने करण्याचे महत्त्वही विद्यार्थिनींना पटवून देण्यात आले. या उपक्रमासाठी प्रा. नमिता पाठक यांच्या मार्गदर्शनाखाली प्रा. शोभा पाटील, प्रा. रुपाली शिंदे तसेच क्लिनिकल इन्स्ट्रक्टर कु. प्रियांका कदम, कु. स्मिता पडाळे आणि कु. सिद्धी पिसाळ यांनी सहकार्य केले.
दरम्यान, या आरोग्य जनजागृती सत्रामुळे विद्यार्थिनींना किशोरावस्थेतील आरोग्यविषयक समस्यांची योग्य माहिती मिळण्यास आणि आरोग्यदायी जीवनशैली विकसित करण्यास मदत झाली. शालेय स्तरावर आरोग्यविषयक जागरूकता निर्माण करून निरोगी समाजाच्या निर्मितीस हातभार लावण्याच्या दृष्टीने हा उपक्रम महत्त्वपूर्ण ठरला.
