डॉ. अशोक बालगुडे
मुंबई : देशातील ऐतिहासिक आणि अत्यंत वर्दळीच्या छत्रपती शिवाजी महाराज टर्मिनस (सीएसएमटी) स्थानकात गुरुवारी रात्री सुमारे दहा वाजण्याच्या सुमारास तिकीटघराच्या प्रवेशद्वाराजवळ छताचा काही भाग कोसळून दोन प्रवासी जखमी झाले. विनायक हटकर (२८) आणि अयान मातवणकर (२४) यांना उपचारांसाठी सेंट जॉर्ज रुग्णालयात दाखल करण्यात आले. स्थानकाच्या पुनर्विकासाचे काम सुरू असताना घडलेल्या या घटनेमुळे प्रवाशांच्या सुरक्षिततेचा प्रश्न ऐरणीवर आला आहे.
जखमी हटकर यांच्या डोक्याला टाके घालावे लागले, तर मातवणकर यांच्या डोळ्याच्या पापणीला आणि शरीराच्या इतर भागांना किरकोळ दुखापत झाली. संबंधित परिसरात रेल्वे भूमी विकास प्राधिकरणाच्या (आरएलडीए) वतीने पुनर्विकासाचे काम सुरू आहे. त्यामुळे बांधकामाच्या ठिकाणी प्रवाशांच्या सुरक्षिततेसाठी आवश्यक उपाययोजना करण्यात आल्या होत्या का, असा प्रश्न उपस्थित होत आहे.
सीएसएमटी हे मुंबईतील महत्त्वाचे रेल्वे स्थानक असून, दररोज मोठ्या संख्येने प्रवासी येथून प्रवास करतात. अशा ठिकाणी बांधकाम सुरू असताना सुरक्षित मार्ग, संरक्षक व्यवस्था आणि छताच्या भागाची स्थिरता यांची काटेकोर तपासणी होणे आवश्यक आहे. मात्र, छताचा भाग कोसळण्यामागील नेमके कारण अद्याप स्पष्ट झालेले नाही.
विशेष म्हणजे, याच महिन्याच्या सुरुवातीला सीएसएमटीबाहेरील जुन्या इमारतीच्या भिंतीचा भाग कोसळला होता. त्या घटनेत वाहनांचे नुकसान झाले होते. आता स्थानकाच्या प्रवेशद्वाराजवळ छताचा भाग कोसळल्याने परिसरातील बांधकामे आणि पुनर्विकासाच्या कामांच्या सुरक्षिततेबाबत चिंता वाढली आहे.
ऐतिहासिक वारसा जपताना प्रवाशांच्या जिवाची सुरक्षा दुय्यम ठरता कामा नये. पुनर्विकासाच्या कामात निष्काळजीपणा झाला आहे का, छताच्या भागाची आधी तपासणी करण्यात आली होती का आणि भविष्यात अशा घटना टाळण्यासाठी कोणती खबरदारी घेतली जाणार आहे, याची रेल्वे प्रशासनाने स्पष्ट उत्तरे देणे आवश्यक आहे.
