दौंड, ता. 23 : राशीन–भिगवण रस्त्यावर कारला कट मारल्याच्या कारणावरून झालेल्या वादाचे रूपांतर मारहाणीत झाल्याची घटना घडली आहे. हि घटना खानोटा (ता. दौंड) गावच्या हद्दीत 20 ऑक्टोबर रोजी दुपारी सुमारे अडीज वाजण्याच्या सुमारास घडली. या प्रकरणात अज्ञात सात जणांनी शिवीगाळ व दमदाटी करत मारहाण केली, तसेच क्रेटा कारच्या पुढील काचेवर दगड मारून काच आणि उजव्या बाजूचा आरसा फोडला आहे.
याप्रकरणी योगेश गोकुळ सराटे (वय 35, रा. राजुरी, ता. करमाळा, जि. सोलापूर) यांनी दौंड पोलीस ठाण्यात फिर्याद दिली आहे. त्यानुसार सात अज्ञात व्यक्तींविरुद्ध गुन्हा नोंदविण्यात आला आहे. पोलिसांनी दिलेल्या माहितीनुसार, योगेश सराटे हे शेती व्यवसाय करतात. त्यांच्या मालकीचा महिंद्रा कंपनीचा ट्रॅक्टर बारामती ॲग्रो साखर कारखान्यासाठी ऊस वाहतूक करत होता. ट्रॅक्टरच्या ट्रेलरच्या चाकाची डिस्क खराब झाल्याची माहिती चालकाने दिल्यानंतर सराटे हे आपल्या साथीदारांसह क्रेटा कारमधून चाक घेऊन निघाले होते.
दरम्यान, खानोटा गावच्या हद्दीत रेल्वे पुलावर चढत असताना समोरून येणाऱ्या एका कारने त्यांच्या कारला कट मारल्याचा आरोप आहे. त्यानंतर सराटे यांनी संबंधित कारचा पाठलाग करून राजेगावकडे जाणाऱ्या रस्त्याजवळ ती थांबवली. चालकाला कट मारण्याबाबत विचारणा केली असता, दोघांमध्ये वाद सुरू झाला.
दुसऱ्या कारमधून आलेल्या पाच जणांचाही सहभाग
या वादादरम्यान संबंधित कारमधील व्यक्तीने सराटे आणि त्यांच्या साथीदारांना शिवीगाळ करण्यास सुरुवात केली. त्यानंतर टाटा पंच ईव्हीमधून आणखी पाच जण घटनास्थळी आले. या सर्वांनी मिळून धक्काबुक्की व मारहाण केली, तसेच क्रेटा कारच्या पुढील काचेवर दगड मारून काच आणि उजव्या बाजूचा आरसा फोडून नुकसान केले आहे. या घटनेप्रकरणी कारमधील आणि टाटा पंच ईव्हीमधील एकूण सात अज्ञात व्यक्तींविरुद्ध भारतीय न्याय संहितेच्या विविध कलमान्वये गुन्हा दाखल करण्यात आला आहे. गुन्ह्याचा पुढील तपास पोलीस अंमलदार पानसरे करीत आहेत.
