मुंबई : मानसिक आरोग्य आणि शांतता ही अभ्यासापेक्षा आणि यशापेक्षाही कितीतरी पटीने महत्त्वाची असते, हे सांगणारी एक दुर्दैवी घटना मुंबईत घडली आहे. माटुंगा येथील नामांकित ‘इन्स्टिट्यूट ऑफ केमिकल टेक्नॉलॉजी’ (ICT) मधील अवघ्या 19 वर्षांच्या एका विद्यार्थ्याने वसतिगृहातील आपल्या खोलीत गळफास घेऊन आत्महत्या केली. सिद्धेश पाटील असे या मृत विद्यार्थ्याचे नाव असून तो केमिकल इंजिनिअरिंगच्या दुसऱ्या वर्षात शिकत होता.
मूळचा नाशिकचा असलेला सिद्धेश अभ्यासात अत्यंत हुशार होता. मागील सेमिस्टरमध्ये त्याने महाविद्यालयात प्रथम क्रमांक पटकवला होता. त्याचे वडीलही नाशिकमधील एका इंजिनिअरिंग कॉलेजमध्ये प्राध्यापक आहेत. मात्र, गेल्या 3 वर्षांपासून सिद्धेश तीव्र नैराश्याशी (डिप्रेशन) लढा देत होता आणि त्यावर उपचारही घेत होता. मृत्यूच्या 8 दिवस आधी त्याने औषधे घेणे बंद केले होते.
मंगळवारी सायंकाळी सिद्धेशने नाशिकमधील आपल्या मानसोपचारतज्ज्ञांना फोन करून आत्महत्येचे विचार येत असल्याचे सांगितले. डॉक्टरांनी तत्काळ त्याच्या वडिलांना ही माहिती दिली. वडिलांनी लागलीच मुंबईतील त्याच्या मित्रांशी संपर्क साधला. मित्रांनी वसतिगृहातील खोलीचे कुलूप तोडून आत प्रवेश केला, तेव्हा सिद्धेश फासावर लटकलेल्या अवस्थेत आढळला. त्याला सायन रुग्णालयात नेण्यात आले, परंतु डॉक्टरांनी त्याला मृत घोषित केले.
विशेष म्हणजे, या घटनेच्या अवघ्या काही तास आधी सिद्धेश सोशल मीडियावर मित्रांशी कॉलेज प्रोजेक्टबद्दल चर्चा करत होता. त्याचा एक रूममेट दसऱ्यासाठी गावी गेला होता, तर दुसरा जेवणासाठी बाहेर गेला होता.
गेल्या 20 वर्षांत ‘आयसीटी’मध्ये अशी कोणतीही घटना घडली नव्हती, त्यामुळे या बातमीने संपूर्ण संस्थेत शोककळा पसरली आहे. माटुंगा पोलिसांनी या प्रकरणी अपमृत्यूची नोंद केली असून, सिद्धेशच्या कुटुंबीयांचे व मित्रांचे जबाब नोंदवून अधिक तपास केला जात आहे.
