Loni kalbhor लोणी काळभोर, ता. 22 : कदमकवाकवस्ती (ता. हवेली) ग्रामपंचायत हद्दीतील कवडीपाट परिसरात असलेल्या महारुद्र सोसायटीतील एका फ्लॅटमध्ये फटाक्यांमुळे लागलेल्या आगीने मध्यरात्री मोठा थरार निर्माण केला. काही क्षणांतच आगीने भीषण रूप धारण केल्याने परिसरात भीतीचे वातावरण पसरले होते. मात्र, स्थानिक तरुणांच्या प्रसंगावधानामुळे आणि अग्निशमन दलाच्या तत्पर कारवाईमुळे संभाव्य मोठा अनर्थ टळला. Loni kalbhor
मंगळवारी (ता. 21) रात्री बारा वाजण्याच्या सुमारास सोसायटीच्या पाचव्या मजल्यावरील फ्लॅटमध्ये अचानक आग लागली. सुरुवातीला किरकोळ वाटणारी ही आग काही क्षणांतच भडकली आणि घरातील ज्वलनशील वस्तूंना चटकन पेट घेतल्याने आगीचा फैलाव वेगाने झाला. जळत्या आगीच्या ज्वाळा आणि धुराचे लोट संपूर्ण परिसरात पसरल्याने नागरिकांमध्ये मोठी घबराट निर्माण झाली. Loni kalbhor
घटनेची माहिती मिळताच परिसरातील समीर शेंडगे, प्रज्वल गुजर, राज गुजर, जितेंद्र नांगरे आणि अभिजीत आल्हाट या तरुणांनी जीवाची पर्वा न करता तत्काळ घटनास्थळी धाव घेतली. त्यांनी प्राथमिक साधनांच्या मदतीने आगीवर नियंत्रण मिळवण्याचा प्रयत्न करत इमारतीतील इतर रहिवाशांना सतर्क केले. त्यांच्या या धाडसी प्रयत्नांमुळे आगीचा फैलाव काही प्रमाणात रोखण्यात यश आले. Loni kalbhor
दरम्यान, घटनेची माहिती पुणे महापालिकेच्या हडपसर अग्निशमन केंद्राला देण्यात आली. माहिती मिळताच अग्निशमन दलाचे अधिकारी आणि जवान तात्काळ घटनास्थळी दाखल झाले. अग्निशमन अधिकारी उत्कर्ष टिळेकर यांच्या नेतृत्वाखाली फायरमन सोमनाथ मोटे, ज्ञानेश्वर आढाळगे, मंगेश शिंदे, भास्कर घुले आणि बाबासाहेब चव्हाण यांनी शिताफीने पाण्याचा मारा करत आगीवर पूर्णपणे नियंत्रण मिळवले.Loni kalbhor
या आगीत घरातील फर्निचर, इलेक्ट्रॉनिक साहित्य, घरगुती वस्तू यांचे मोठ्या प्रमाणावर नुकसान झाले असून आर्थिक फटका बसल्याचे प्राथमिक अंदाज आहेत. सुदैवाने, या घटनेत कोणतीही जीवितहानी झाली नाही, ही मोठी दिलासादायक बाब ठरली आहे. घटनेनंतर काही काळ परिसरात तणावपूर्ण वातावरण निर्माण झाले होते. नागरिकांनी मोठ्या संख्येने घटनास्थळी गर्दी केली होती. मात्र, अग्निशमन दलाच्या वेगवान आणि समन्वयपूर्ण कारवाईमुळे परिस्थिती लवकरच नियंत्रणात आली. Loni kalbhor
