कोल्हापूर : जिल्ह्यातून संतापजनक आणि धक्कादायक प्रकार उघडकीस आला असून, कर्जाच्या मोबदल्यात एका महिलेचे तब्बल तीन वर्षे लैंगिक शोषण केल्याची घटना समोर आली आहे. आरोपीने केवळ अत्याचारच केला नाही, तर पीडितेचे अश्लील फोटो व व्हिडिओ काढून तिचा ब्लॅकमेलसाठी वापर केल्याचेही तपासात उघड झाले आहे.
माहितीनुसार, पीडित महिलेने घरगुती गरजांसाठी आरोपीकडून सुमारे दोन लाख रुपये १० टक्के व्याजाने घेतले होते. मात्र, वाढत्या व्याजामुळे कर्ज फेडणे अशक्य झाल्यानंतर आरोपीने या परिस्थितीचा गैरफायदा घेतला. “पैसे दे, अन्यथा शारीरिक संबंध ठेव,” अशी धमकी देत त्याने वारंवार अत्याचार केले.
या दरम्यान आरोपीने महिलेचे आक्षेपार्ह व्हिडिओ तयार करून ते तिच्या नातेवाईकांना दाखवण्याची धमकी दिली. इतकेच नव्हे, तर पीडितेच्या जावयालाही व्हिडिओ दाखवून पैशांची मागणी केल्याचा आरोप आहे. सामाजिक बदनामीच्या भीतीने पीडित महिला दीर्घकाळ गप्प राहिली.
मात्र, सततच्या छळाला कंटाळून अखेर तिने धाडस दाखवत पोलिसांत तक्रार नोंदवली. यानंतर गांधीनगर पोलीस ठाणे येथे आरोपीविरुद्ध बलात्कार, धमकी व ब्लॅकमेलिंगचे गुन्हे दाखल करण्यात आले आहेत.
दरम्यान, पोलीस या प्रकरणाचा अधिक तपास करत असून, आरोपीकडून अशाच प्रकारे इतर महिलांचे शोषण झाले आहे का, याचाही शोध घेतला जात आहे.
