दौंड, ता. 22 : शेतात विनापरवाना कांद्याची साठवणूक का करता, असा जाब विचारल्याच्या रागातून महीलेसह तिघांनी एका 65 वर्षीय शेतकऱ्याला दगडाने आणि लाथाबुक्क्यांनी अमानुष मारहाण केल्याची घटना घडली. सोमवारी (ता. 20) सायंकाळी साडेपाच वाजण्याच्या सुमारास काळेवाडी गावचे हद्दीत जमिन गट क्र 56/3 मध्ये घडली.
कल्याण तुकाराम माने, (वय 65 वर्षे, व्यवसाय-शेती. रा. हिंगणीबेर्डी माने वस्ती, ता. दौंड) असे मारहाण झालेल्या शेतकऱ्याचे नाव आहे. या हल्ल्यात माने गंभीर जखमी झाले असून त्यांच्यावर खासगी रुग्णालयात उपचार सुरू आहेत. तर सुदाम प्रल्हाद ढवळे, प्रल्हाद कृष्णा ढवळे, वनिता सुदाम ढवळे, (सर्व रा. विठ्ठलनगर, हिंगणीबेर्डी, ता. दौंड) अशी मारहाण करणाऱ्या तिघांची नावे आहेत. याप्रकरणी माने यांनी दिलेल्या तक्रारीनुसार तिघांवर दौंड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी कल्याण माने हे सोमवारी सायंकाळी आपल्या काळेवाडी येथील जमिन गट क्र 56/3 मधील शेतात मशागतीसाठी गेले होते. यावेळी त्यांच्या शेतात शेजारी राहणारे आरोपी सुदाम ढवळे, प्रल्हाद ढवळे आणि वनिता ढवळे हे त्यांना न विचारता कांद्याची साठवणूक करत असल्याचे त्यांना दिसले.
माने यांनी या साठवणुकीबाबत जाब विचारला असता, आरोपी सुदाम प्रल्हाद ढवळे याने चिडून जाऊन जवळच असलेला दगड उचलून कल्याण माने यांच्या डोक्यात घातला. या प्रहारामुळे माने यांच्या डोक्याला गंभीर दुखापत होऊन मोठा रक्तस्राव सुरू झाला. त्याच वेळी आरोपी प्रल्हाद ढवळे आणि वनिता ढवळे यांनी त्यांना लाथाबुक्क्यांनी मारहाण करत अश्लील शिवीगाळ केली.
भांडणाचा आवाज ऐकून फिर्यादींचा मुलगा चांगदेव माने हा मदतीला धावून आला. यावेळी आरोपींनी “पुन्हा आमच्या कामात अडथळा आणला, तर तुम्हाला जिवंत सोडणार नाही,” अशी धमकी देऊन तिथून पळ काढला. मुलाने जखमी वडिलांना तातडीने दौंड पोलीस स्टेशन आणि त्यानंतर उपजिल्हा रुग्णालयात नेले. सध्या त्यांच्यावर दौंड येथील एका खासगी रुग्णालयात उपचार सुरू आहेत.
दरम्यान माने यांनी दिलेल्या तक्रारीनुसार त्यांच्याविरुद्ध भारतीय न्याय संहिता (BNS) कलम ११८(१), ११५(२), ३५२, ३५१(२) आणि ३(५) अन्वये गुन्हा दाखल केला आहे. या प्रकरणाचा पुढील तपास पोलीस हवालदार विनोद चव्हाण करत आहेत.
