पुणे : गेल्या दोन -तीन दिवसांपासून पुणे शहर आणि जिल्हा परिसरात पावसाने जोरदार बॅटिंग सुरू केली आहे. आता हवामान विभागाने पुणेकरांसाठी एक महत्त्वाचा इशारा दिला असून, पुढील 2 ते 3 दिवस जिल्ह्यात पावसाचा जोर असाच कायम राहण्याची शक्यता वर्तवली आहे. विशेषतः पुणे जिल्ह्याच्या घाट विभागासाठी पुढील दोन दिवस ‘रेड अलर्ट’ जारी करण्यात आला आहे. त्यामुळे पर्यटकांनी आणि नागरिकांनी घाट माथ्यावर जाताना विशेष सतर्कता बाळगावी, असे आवाहन प्रशासनाने केले आहे.
शनिवार (ता. 4) पासून सुरू असलेल्या संततधार पावसामुळे पुणे शहरातील जनजीवन पूर्णपणे विस्कळित झाले आहे. शिवाजीनगर, स्वारगेट, हडपसर, कात्रज, कोथरूड, सिंहगड रस्ता, बाणेर आणि पिंपरी-चिंचवड या भागांतील प्रमुख रस्त्यांवर मोठ्या प्रमाणावर पाणी साचले होते. शनिवार संध्याकाळी कार्यालये सुटण्याच्या वेळेत रस्ते जलमय झाल्याने अनेक चौकांमध्ये प्रचंड वाहतूक कोंडी झाली आणि वाहनांचा वेग मंदावला होता.
आज रविवारी (ता. 5) सकाळीही शहरात पावसाची रिपरिप सुरूच आहे. आज दुपारनंतर आकाश ढगाळ राहून हलक्या ते मध्यम स्वरूपाच्या सरी कोसळण्याची शक्यता आहे. आजचे कमाल तापमान 26 अंश सेल्सिअस तर किमान तापमान 23 अंश सेल्सिअसच्या आसपास राहण्याचा अंदाज वर्तवण्यात आला आहे. यापूर्वी शनिवारी कमाल तापमान 26 अंश सेल्सिअस आणि किमान तापमान 21.7 अंश सेल्सिअस नोंदवले गेले होते.
सलग कोसळणाऱ्या या पावसामुळे गेल्या काही दिवसांपासून जाणवणाऱ्या उकाड्यापासून पुणेकरांना मोठा दिलासा मिळाला असून, संपूर्ण परिसरात कमालीचा गारवा निर्माण झाला आहे. पावसाची ही स्थिती पाहता प्रशासनाने नागरिकांना विनाकारण घराबाहेर न पडण्याचे आणि आवश्यक ती खबरदारी घेण्याचे आवाहन केले आहे.
