पुणे : पुण्यातील मुळशी तालुक्यातून एक संतापजनक प्रकार समोर आला आहे. हॉटेल बंद झाल्यामुळे जेवण मिळाले नाही, या किरकोळ कारणावरून काही तरुणांनी हॉटेलची तोडफोड करत परिसरात दहशत माजवली. याप्रकरणी पौड पोलीस ठाण्यात या 5 तरुणांविरुद्ध गुन्हा दाखल करण्यात आला आहे.
ही घटना कोंढावळे गावातील ‘विशाल हॉटेल’ येथे घडली. हॉटेलचे मालक विशाल सुरेश शिर्के (वय 35) यांनी याबद्दल पोलिसांत फिर्याद दिली आहे. रात्रीची वेळ झाल्यामुळे हॉटेलमधील कामगार साडेदहाच्या सुमारास दुकान बंद करून जेवण करत होते. त्याच वेळी दोन वेगवेगळ्या चारचाकी गाड्यांमधून 5 जण तिथे आले आणि त्यांनी जेवणाची मागणी केली. कामगारांनी हॉटेल बंद झाले असल्याचे सांगत जेवण देण्यास नकार दिला.
नकार ऐकताच या तरुणांचा राग अनावर झाला आणि त्यांनी हॉटेल परिसरात मोठा राडा घातला. संतापलेल्या तरुणांनी हॉटेलमधील खुर्चींची नासधूस केली आणि मालकाच्या दुचाकीची देखील तोडफोड केली. एवढ्यावरच न थांबता त्यांनी कामगारांना शिवीगाळ करत दमदाटी केली आणि बेकायदेशीर जमाव जमवून परिसरात भीतीचे वातावरण निर्माण केले.
सचिन मेंगडे, भास्कर राऊत, तेजस जोशी, सौरभ गुजर आणि लखन जाधव (सर्व रा. पौड, ता. मुळशी) अशी गुन्हा दाखल करण्यात आलेल्या 5 आरोपींची नावे आहेत. या किरकोळ कारणावरून झालेल्या मारहाण व तोडफोड प्रकरणामुळे स्थानिक नागरिकांमध्ये संतापाचे वातावरण पाहायला मिळत असून, पौड पोलीस या प्रकरणाचा पुढील तपास करत आहेत.
