Fursungi फुरसुंगी, ता. 22 : फुरसुंगी-उरुळी देवाची नगरपरिषदेच्या हद्दीत प्रलंबित असलेल्या मूलभूत कामांकडे प्रशासनाने दुर्लक्ष केल्याचा आरोप करत भाजप गटनेते तथा नगरसेविका अमृता धनंजय कामठे आणि भाजप पुणे जिल्हा कार्यालय प्रमुख धनंजय कामठे यांनी 4 मे 2026 रोजी आंदोलनाचा इशारा दिला आहे. विविध नागरी समस्यांवर तातडीने तोडगा न काढल्यास तीव्र आंदोलन छेडले जाईल, असा इशारा देण्यात आला आहे. Fursungi
नगरपरिषद क्षेत्रातील रस्ते, पाणीपुरवठा, वीज, ड्रेनेज, कचरा व्यवस्थापन, नोकऱ्यांमधील स्थानिकांना प्राधान्य अशा अनेक मूलभूत मुद्द्यांवर प्रशासनाकडून अपेक्षित कार्यवाही होत नसल्याने नागरिकांमध्ये तीव्र नाराजी निर्माण झाली आहे. याच पार्श्वभूमीवर या आंदोलनाची घोषणा करण्यात आली आहे. Fursungi
दरम्यान, या सर्व मागण्यांसाठी नगरपरिषदेचे मुख्याधिकारी प्रसाद शिंगटे यांना निवेदन देण्यात आले असून, लवकरात लवकर निर्णय न झाल्यास 4 मे रोजी आंदोलन छेडण्याचा निर्धार कामठे यांनी व्यक्त केला आहे. या आंदोलनामुळे स्थानिक राजकारण तापण्याची चिन्हे दिसत असून, प्रशासन आता काय भूमिका घेते, याकडे नागरिकांचे लक्ष लागले आहे.
मुख्य मागण्या पुढीलप्रमाणे :
गावातील प्रमुख डीपी-आरपी रस्त्यांची मोजणी करून तातडीने डागडुजी करावी.
सर्व फ्लॅटधारकांना स्वच्छ पिण्याचे पाणी मिळावे यासाठी नळ कनेक्शन देऊन पाणीपुरवठा सुरळीत करावा.
मुख्य व अंतर्गत रस्त्यांवर पथदिवे बसवून नादुरुस्त दिवे तात्काळ सुरू करावेत; महावितरणच्या तारा भूमिगत कराव्यात.
कंत्राटी नोकरभरतीत ठेकेदार बदलून स्थानिक भूमिपुत्रांना प्राधान्य द्यावे.
ड्रेनेज व पावसाळी लाईनची कामे पूर्ण करून नियमित देखभाल करावी.
नवीन प्रशासकीय इमारत उभारून ओढ्यावर पूल बांधावा.
टीपी स्कीमचे अधिकारी पूर्णवेळ उपलब्ध राहावेत.
कचरा व्यवस्थापन सुधारून नियमित साफसफाई करावी.
आठवडे बाजारासाठी ओटे, शेड व शौचालय उभारावे आणि जुन्या विक्रेत्यांना परवाने द्यावेत.
गंधनखिळा टेकडी येथे शौचालय, स्ट्रीट लाईट, ओपन जिम, सभागृह उभारून वृक्षारोपण प्रकल्प राबवावा. Fursungi
