छत्रपती संभाजीनगर: उल्हासनगरमधील (Chhatrapati Sambhajinagar) मिसारवाडी परिसरात (Crime News) एका पोलीस कर्मचाऱ्याने पत्नीवर केलेल्या मारहाणीची धक्कादायक घटना उघडकीस आली आहे. खाकी वर्दीचा दबदबा दाखवत त्याने पत्नीला लाथाबुक्क्यांनी मारहाण केली तसेच स्वयंपाकघरातील लाकडी दांडक्यानेही हल्ला केला. या घटनेनंतर सिडको पोलीस ठाण्यात त्याच्याविरुद्ध गुन्हा दाखल करण्यात आला आहे.
नितीन बापुराव ढवळे असे आरोपी पोलीस कर्मचाऱ्याचे नाव आहे. तो सध्या खुलताबाद पोलीस ठाण्यात कार्यरत आहे. मिळालेल्या माहितीनुसार, नितीन कामावरून घरी आल्यानंतर त्याने गाडी सार्वजनिक रस्त्यावर उभी केली होती. त्याची पत्नीने गाडी रस्त्यावर ठेवू नये असे सांगितले असता नितीन संतापला आणि पत्नीवर शिवीगाळ करत अचानक हल्ला केला. “मी पोलिस आहे, मला कोण काय करणार” असे ओरडत त्याने तिला लाथाबुक्क्यांनी मारहाण केली. त्यानंतर स्वयंपाकघरातून लाकडी दांडका घेऊन पत्नीच्या अंगावर वार केले. यामध्ये पत्नी गंभीर जखमी झाली.
घटनेदरम्यान नातेवाईकांनी हस्तक्षेप करत वाद शांत केला. जखमी महिलेला तातडीने रुग्णालयात नेण्यात आले व उपचारानंतर तिने सिडको पोलीस ठाण्यात पतीविरुद्ध लेखी तक्रार दिली. तक्रारीच्या आधारावर पोलिसांनी नितीन ढवळे याच्याविरुद्ध मारहाण, जीवे मारण्याची धमकी आणि घरगुती हिंसाचाराच्या विविध कलमांखाली गुन्हा नोंदवला आहे.
या प्रकरणाचा पुढील तपास सिडको पोलिसांनी सुरू केला असून, आरोपीवर कायदेशीर कारवाई करण्यात येणार असल्याची माहिती पोलिसांनी दिली आहे.
