Crime News: छत्रपती संभाजीनगर: छत्रपती संभाजीनगर जिल्ह्यात पत्नीचा शारीरिक आणि मानसिक छळ करून तिची हत्या केल्याप्रकरणी पतीला जन्मठेपेची शिक्षा सुनावण्यात आली आहे. जिल्हा व सत्र न्यायालयाने दिलेल्या या निर्णयामुळे महिलांवरील अत्याचाराविरोधात कठोर संदेश गेला आहे. आरोपी पती लईक जावेद अन्सारी (वय 36, रा. कुंजखेडा, ता. कन्नड) याला जन्मठेपेसह 50000 रुपयांचा दंड ठोठावण्यात आला आहे.
मृत रेशमा (वय 23) हिचे आरोपीसोबत सुमारे सहा महिन्यांपूर्वी दुसरे लग्न झाले होते. पहिल्या लग्नातून तिला पाच वर्षांची मुलगी असून कौटुंबिक कारणांमुळे ती पहिल्या पतीपासून वेगळी झाली होती. दुसऱ्या विवाहानंतर सुरुवातीला संसार सुरळीत सुरू होता. मात्र काही काळानंतर पतीकडून शारीरिक संबंधांच्या कारणावरून शिवीगाळ, मारहाण आणि मानसिक छळ सुरू झाल्याचे रेशमाने आपल्या माहेरच्या लोकांना सांगितले होते.
मुलीच्या तक्रारीनंतर दोन्ही कुटुंबीयांमध्ये बैठक घेऊन वाद मिटवण्याचा प्रयत्न करण्यात आला. तरीही छळ थांबला नाही, असे रेशमाने पुन्हा सांगितले होते. 24 ऑक्टोबर 2024 रोजी रात्री रेशमा माहेरी आली होती आणि त्रास सुरू असल्याची माहिती दिली होती. रात्री उशीर झाल्याने सकाळी चर्चा करू, असे सांगून तिला पुन्हा सासरी पाठवण्यात आले.
25 ऑक्टोबर 2024 रोजी पहाटे सुमारे 3.30 वाजता आरोपीने आपल्या मित्राला फोन करून पत्नीला मारल्याची माहिती दिली. त्यानंतर ही बाब रेशमाच्या वडिलांना कळवण्यात आली. माहिती मिळताच माहेरचे लोक तातडीने तिच्या घरी पोहोचले. घराला बाहेरून कुलूप असल्याने ते तोडून आत प्रवेश केला असता रेशमा जमिनीवर बेशुद्ध अवस्थेत आढळली. तिला तात्काळ रुग्णालयात नेण्यात आले, मात्र डॉक्टरांनी मृत घोषित केले.
या प्रकरणी कन्नड शहर पोलीस ठाण्यात गुन्हा दाखल झाला होता. तपास पूर्ण करून दोषारोपपत्र दाखल करण्यात आले. सुनावणीनंतर साक्षी आणि पुराव्यांच्या आधारे न्यायालयाने आरोपीला दोषी ठरवत जन्मठेपेची शिक्षा सुनावली.
